USA ka call center agent ang nagpakamatay sulod sa iyang giabangan nga boarding house atol sa pagsaulog sa Valentines Day niadtong Dominggo didto sa Cabrera Boarding House, Arellano Extension, siyudad sa Davao.
Napalgan nga nagbitay sa pisi sa alas 7:30 sa gabii mao si Leslie Jean Grancho, 22, empleyada sa Sutherland Global Services Philippines, lumad nga taga Bermuda, Tagum City.
Base sa spot report sa San Pedro Police Station, ang biktima napalgan nga nagbitay sulod sa iyang lawak pinaagi ni Paul Pogoso.
Si Pogoso gihangyo ni Mark June Femis, hinigugma sa namatay, nga susihon ang lawak niini gumikan kay dili motubag ang dalaga sa iyang tawag sa cellular phone.
Sa pagsusi ni Pogoso maoy misugat sa iyang mga mata ang bitkima nga nagbitay gamit ang pisi mao nga gipahibalo dayon nila ang kapulisan.
Mga sakop sa Scene of the Crime Operatives nagbutyag nga patay na ang biktima sa ilang paghiabot mao nga gidala ang iyang patay'ng lawas sa Angel Funeral Homes.
Nagtuo ang kapulisan nga dunay dakong suliran ang biktima mao nga nagpakamatay kini atol sa pagsaulog sa Valentine's Day.
Si Dodong, uyoan sa biktima, nagbutyag sa Superbalita pinaagi sa tawag sa telepono didto sa punerarya nga wala pa sila masayud sa tinuod nga hinungdan nganong nagpakamatay ang biktima.
"Wala man daw sila nag-away sa iyang live-in partner nga si Mark June ingon sa ilang mga silingan," suma ni Dodong. (AD)