NAGKAUSA sila si pound-for-pound champion Manny Pacquiao ug American trainer Freddie Roach sa pag-ingon nga angayan gyud untang modaog si Gerry “Fearless” Peñalosa batok kang Puerto Rican Eric Morel niadtong Dominggo sa Pinoy Power 3/Latin Fury 13 sa Las Vegas Hilton.
Gisupak nila ni Pacquiao ug Roach ang split decision nga nipabor kang Morel. Ang duha ka judges ningpadaog kang Morel, 115-113, 116-112 samtang ang usa ka judge nidapig kang Peñalosa, 115-113.
Sa banabana ni Pacquiao, pito ka rounds ang nadag-an sa iyang kumpare hinungdan nga natingala siyang midaog si Morel.
“Talagang panalo si Gerry. Lamang siya ng pitong rounds,” matod ni Pacquiao dihang gipangutana sa ABS-CBN kon unsa’y iyang panan-aw sa away.
Sa laing bahin, matod ni Pacquiao nga personal gyud siyang motabang sa pagtudlo sa iyang gidumalang boksidor nga si Bernabe “The Real Deal” Concepcion sa higayon nga mo-challenge na kini kang WBO featherweight champion Puerto Rican Juan Manuel Lopez.
Mao kini ang gipabuhagay ni Pacquiao human sa impresibong unanimous decision nga kadaugan ni Concepcion batok kang Puerto Rican Mario “Principe Ponce” Santiago sa undercard sa Pinoy Power 3.
“Proud ako sa boksingero ko. Next fight niya is Juan Manuel Marquez... ‘Pag lumaban siya, kailangang nandoon ako lagi araw-araw sa training niya,” matod ni Pacquiao.
Gitino ni Pacquiao nga aduna pay gamayng kuwang sa abilidad ni Concepcion nga kinahanglan niyang mabansay og maayo sa higayon nga makigharong na kini kang Lopez.
“Kulang lang yung timing. Coordination sa paa niya at saka sa kamay niya,” batbat ni Pacquiao, kinsa gikatakdang modepensa sa iyang WBO welterweight title batok kang Ghanaian Joshua Clottey karong Marso 13 sa Dallas Cowboys Stadium.