MOBALIK na dinhi sa Sugbo karong buntag si ALA boy Z “The Dream” Gorres human sa tulo ka mga buwan gikan niadtong insidente ibabaw sa ring nga diriyot mikalas sa iyang kinabuhi.

Kauban ni Gorres mao ang iyang asawa nga si Datches, kinsa usa sa mga nag-atiman kaniya sa iyang rehabilitasyon sa Las Vegas human sa malampusong duha ka mayorihiyang operasyon sa utok.

For updates from around the country, follow Sun.Star on Twitter

Gikan sa Las Vegas, gikatakdang moabot si Gorres sa Manila karong alas 5:30 sa buntag sa Ninoy Aquino International Airport.

Gipasabot ni ALA Promotions president Michael Aldeguer daghan untang imbitasyon si Gorres gikan sa nagkadaiyang media outlets apan wala kini nila napaundayunan tungod kay lisod ang pagbiyahe alang sa Mandauehanon.

“I understand nga ang media crew na lang ang moadto sa airport kay lisod pa kaayo ang mobility for Gorres,” matod ni Aldeguer, kinsa naa sa Manila aron pagsugat sa usa sa labing maayong boksidor dinhi sa Sugbo.

Si Gorres, kinsa nagpanikad nang makakita pagbalik sa iyang upat ka mga anak, nakaeskedyul nga maabot dinhi sa Sugbo karong alas 10:30 sa buntag.

Ang tibuok pamilya ni Gorres moderetso sa usa ka luncheon meeting sa Patio Isabel sa Banilad kauban ang mga sakop sa Cebu local media.

Sa iyang pagbiya sa Las Vegas, daghan gyud kaayo ang naghatod kang Gorres nga gipangulohan ni Dr. Benito Calderon ug sa asawa niini, timaan lang kini kon giunsa siya pagpangga didto hilabi na sa mga Pinoy OFWs.

Sa wala pa siya mogikan, personal unang nitan-aw si Gorres sa “Pinoy Power 3/Latin Fury 13” boxing promotion sa Las Vegas Hilton.

Sa kasamtangan, si Gorres makasulti na’g gamay apan dili pa gihapon kini makalakaw.

Naoperahn siya sa utok dihang nakuyapan siya human sa iyang unanimous decision nga kadaugan batok kang Colombian Luis Melendez niadtong Nobiyembre 13 sa miaging tuig sa Las Vegas.