NAKASABUT. Daghan ang nagpasalamat kang Gob. Gwen Garcia nga nakasabut na gyud siya sa mga binuhatan sa iyang igsoon nga si Byron, nga iyang consultant sa security sa capitol.

Hinuon daghan ang nibilib ni Byron sa iyang nabuhat nga maayo sa CPDRC (Cebu Provincial Rehabilitation Center) labina sa mga dancing inmates nga nabantog sa tibuok kalibutan sa dihang gi-upload sa YouTube ang ilang sayaw.

For updates from around the country, follow Sun.Star on Twitter

Apan dunay dakong apan. Mao kini hinungdan nga hangtud karon wa gisubli ang iyang kontrata ngan nga security consultant sa Kapitolyo. Duna tay nahibaw-an nga rason apan di pa nato maipatik hangtud atong masinati ang ulohan niini.

Basi sa obserbasyon sa kadaghanan, si Byron naghinubra sa iyang gimbulohaton. Usa lang ka consultant si Byron, apan matud pa sa mga hungihong nga mora sad ni siya og, sa inenglis pa, “little governor”. Ang department heads gud mahadlok niya.

Si Lito Gabuya, nga maoy warden a CPDRC, mora intawon og tawo-tawo. Kon unsay imando ni Byron motuman ang pobre. Kon duna may dakog ngisi ron nga wa na si Byron sa Kapitolyo, sa akong tan-aw usa niini si Gabuya.

Gani hapit tanan komitiba ubos sa opisina sa gobernador si Byron miyembro. Ang tsirman sa investigation committee nga usa ka abogado sus mora la’g bata-bata ni Byron kay inig sulti niya and tsirman ug mga miyembro di na motingog.

Daghan wa makahibawo nga si Byron MA (Morag Agobado). Miingon si Byron atol sa hearing sa investigation committee miingon nga mora lang kuno og kangaroo court kini. Di na kinahanglan og ebidensya. Susmaryosep!

Sa tanang mga consultants sa Kapitolyo ug laing mga opisina, morag si Byron ra ang dunay police escort. Gipanghimakak ni kaniadto sa kadagkuan sa pulisya apan dunay security guard sa CPDRC nga mikompirma niini.

Morag tanghaga ang paghawa ni Byron sa CPDRC ngan sa security consultant sa Kapitolyo. Matud pa sa usa ka abogado nga maayo unta kon mawala usab ang parking fee sud sa Kapitolyo kay wa na man si Byron.

Sa tantong tago sa Kapitolyo nga way bikil si Gobernador Gwen ug sa iyang manghod migimaw na hinuon ang matuod nga dunay dakong sala si Byron ngadto sa gobernador. Morag kwarta ang hinungdan, matud pa sa akong duwende.

Matud pa ni Gobernador Gwen atol sa interview nga ang mga consultants igo lang morekomenda. Wa silay responsabilidad, di sila mabasol, ang warden ug ang gobernador ra maoy mamumo kon dunay problema sa CPDRC.

Nakaapas na gyud si Gobernador Gwen, gawas nga nakadaut sa iyang imahen ang mga binuhatan sa iyang manghod, nga si Byron nahikalimot nga security consultant lang siya sa Kapitolyo.

Human magmalampuson ang pangulektag parking fee sa kapitolyo, nangulekta na usab si Byron og P5 matag pasahero nga mosulod o mosakay og bus sa south bus terminal diha sa highway.

Gawas nga mikitag kwarta ang maong sistema sa panguletag P5 sa matag pasahero, kining maong balayranan sa matag pasahero nga mosulod sa terminal nakadugang sa ilang pletihan.

Gani, atong mahinumduman nga gusto ni Mayor Tomas Osmeña nga ikiha ang kapitolyo sa pag-pangulektag P5 sa matag tawo o pasahero nga mosulod sa bus terminal.

Apan wa man madayon ang maong kiha sa way igong rason. Pila kaha ka kandila ang gidagkotan sa mga department heads ug empleyado sa Kapitolyo ug CPDRC agig pasalamat sa pagbiya ni Byron sa Kapitolyo?