NAGPAHIGAYON og hot-pursuit ang kapulisan aron masikop ang sekyu nga nipusil sa usa ka panday Biyernes, Pebrero 15 alas 3:00 sa kaadlawon sa Fatima Subdivision, Upper Puerto siyudad sa Cagayan de Oro.
Patay si Ruben Bacalso, usa ka balo, taga Zone 4, Alae, Bukidnon samtang gidudahan nga suspetsado residente sa maong dapit kinsa giingong usa ka sekyu.
Sa pakighinabi sa SunStar Superbalita kang Police Officer 3 (PO3) Limuel Tecson, imbestigador sa Police Station 6 (PS6) Puerto gibutyag niini nga nag-inom pa ang biktima ug higala nga si Eduardo Rodriguez apan kalit lamang nga niabot ang suspek ug gipusil ang biktima.
“Accordingly around mga 3:00 in the morning nag-inom sila sa gawas duol sa balay sa suspetsado, naa na ni sila’y old grudge daan mao tong ganihang kadlawon gipusil niya,” matud ni Tecson.
Samtang ang nasayran usab ni Rodriguez nga giingong duna nay gamay nga problema ang biktima ug ang sekyu tungod sa pagtrabaho sa biktima sa balay sa suspek.
Gidugang pa nga dili pa usab masuta kun unsa nga klase sa armas ang gigamit sa suspetsado samtang ang patay nga lawas ang anaa na sa punerarya.
Duha ka mga samad pinusilan ang naangkon sa biktima diha sa tuo nga bahin sa li-og ug nigawas sa likod hinungdan sa hinanali niini nga kamatayon.