PATAY ang usa ka lalaki human giluba samtang nag-angkas sa bisikleta sa iyang barkada atol sa Valentine’s Day, Huwebes, Pebrero 14, sa dan Valenzuela corner Gaabucayan, Agora, Lapasan ning siyudad sa Cagayan de Oro.
Samad sa tuo nga bahin sa kilid ang naangkon ni Michael Mania, 21, ulitawo, taga Bukidnon apan kasamtang nagpuyo sa San Juan, Lapasan ning siyudad.
Sa nahipos nga impormasiyon gikabutyag nga angkas ang biktima sa bisikleta sa iyang barkada dihang kalit nga giluba sa wala maila nga suspetsado.
Giingong niuban ang biktima sa iyang barkada nga motabo sa uyab niini.
Matud sa barkada niini nga nakurat na lamang siya dihang mibutyag si Mania nga nalipong siya ug nagkadugo na.
Ang suspetsado giingong naka-jacket ug nakakalo kinsa daling misibat human sa panghitabo.
Dali pa nga gidala sa Northern Mindanao Medical Center (NMMC) ning siyudad ang biktima apan nakabsan na kini sa kinabuhi alas 10:30 sa gabii.