TULO ang gikumpirmang patay nga sakop sa New People’s Army (NPA) dihang ilang gisulong ang Special Forces Patrol base sa Sitio Green Valley, Barangay Dalwangan siyudad sa Malaybalay, Bukidnon.
Kini nga patrol base gitukod alang sa community support sa maong barangay tungod sa presensya sa walhong grupo.
Gibutyag ni Captain Ryan Layug ang commander sa 403rd Brigade nga usa ka sundalo ang namatay ug laing usa ka sundalo ang samdan sukwahi sa gipakatap sa walhong grupo nga upat ilang napatay atol sa hitabo niadtong Huwebes, Pebrero 14, pasado alas 9:40 sa gabii.
Tungod kay nakabantay ang mga sundalo nabalsan kini nila hinungdan miabot ngadto sa 20 minutos ang sinukliay sa bala.
Si Ka Malin Mabini kinsa spokesman sa North Central Mindanao Command sa NPA aminado nga tulo ka sakop sa Mt. Kitanglad Sub Regional Command sa NPA ang napatay apan nakuhaan sab og mga armas ang kampo.
Usa ka M203, tulo ka baby armalite, usa ka M16, usa ka M14 nga garand ang giingong nakuha sa walhong grupo nga gipanag-iyahan sa mga sundalo.
Giklaro sab ni Mabini nga wala gibawal ang pagbutang og bomba kay ilang gipamutang sa dapit ug mobuto lang kung adunay mga lihok nga mahitabo.
Dugang ni Mabilin nga daw tungod sa ilang maayong mga taktika hinungdan nasulongan ang mga sundalo.