PINASAHI ang kasaulogan sa 12th General Assembly sa Iskolar ko ni Bambi (IKNB) atol sa kasaulogan sa Valentine’s Day, Huwebes, Pebrero 14.
Kung matag tuig lain-laing mga pakulo ang giandam sa mga organizer ug coordinators karon mas nahimong emosyonal human unang higayon nga gi-imbitahan og lakip ang mga ginikanan sa mga iskolar diin usa sa labing highlights sa programa ang paghatag og rosas sa mga iskolar ngadto sa ilang mga inahan.
Pipila ka inahan nakahilak labina gipakapinan pa nila og sulti nga “I love you mama” ug giawitan pa og “Awit ng Anak.”
“Nalipay ko kaayo maam kay first time nga nakadawat ko og rose gikan sa akong anak. Akong mga kahago ug sakripisyo nawala tanan basta makita nimo imong anak nag effort ug lakip sa naningkamot nga molampos,” matud sa usa ka inahan nga si Laura.
Mokabat sa 3,000 ka mga iskolar gikan sa nagkalain-laing lungsod ang nagkahiusa sa Tagoloan Dome, lungsod sa Tagoloan, Misamis Oriental.
Kini aron saulogon ang ika-12 nga tigum sa programa nga inisyatiba ug unang gimugna ni Misamis Oriental Governor Yevgeny Vincente Emano.
Sulod sa 12 ka tuig sugod 2007 gibutyag ni Emano nga 19,500 na ka mga iskolar ang migradwar moabot sa 3,000 ang kasamtangan ug umaabot Marso makuhaan na usab kini sila kay aduna man mogradwar ug awtomatiko dayon kining hulipan og laing iskolar nga karon pa daan giawhag na ni Emano nga mo-apply.
Ning tuig sa 2019 adunay pundo nga giandam ang kagamhanan nga P27.9 milyon.
“Nganong bililhon kaayo nako ug gihatagan og pagtagad ang edukasyon? Kay nagtuo ko mga nanay ug tatay nga kung karon kung tagaan nimo imong anak ug tsinelas sa tantong binaklay mahilis lang gihapon. Kung imong anak tagaan mo ug pinakamahal nga telepon moabot ang panahon mahulipan lang gihapon. Bisan og sapot sa kanunay nga paglaba makusnit gihapon. Apan kung edukasyon ang imong itunol ug ihatag sa imong anak hugot akong nagatoo hangtod sa ilang kalamposan hangtod sa ilang kamatayon bitbit nila ang diploma ang edukasyon mao kana ang hinungdan nganong gihatagan nako og dakong pagtagad ang edukasyon,” undanon nga pahayag ni Emano.
Ang tibuok nga kalihukan napuno sa kasadya tungod kay daghang papremyo ang nihulat sa mga iskolar ug lakip sa highlights ang dance competition u gang Anti-Drug Campaign.
Naghatag sab og inspirasyon ngadto sa mga tinun-an ang mga kaagi sa mga Iskolar nga milampos na karon diin sila si Arthur Reyes ug Benjie Liloc nipaabot sa ilang kaagi ug sakripisyo nga maoy angayan sumbahan ug malantaw sa mga iskolar nga milampos sa pagpaningkamot isip usa ka iskolar.
Ang mga iskolar magkuha og upat ka tuig nga kurso nga pwede nila makuha sa nagkalain-laing unibersidad sa Cagayan de Oro ug sa Misamis Oriental.
Gibutyag sab ni Emano nga dili siya matarog sa mga pagbatikos sa iyang kaatbang sa iyang mga programa ug lakip niini.
“Labon bitaw sa una ilang gikuha among mga iskolar kay gitanyagan og mas dako nga budget sa scholarship. Apan nibalik lang gihapon kanamo kay dili makuha ang ilang mga transcript of records sa tunghaan kay wala diay nila mabayri apan among gibayaran kay kini sila nga mga estudyante nahaylo lang sila sa mga pasalig sa pikas,” matud ni Emano.
Gawas sa general assembly laraw sab ni Emano nga magpahigayon og grand reunion sa tanang niaging mga iskolar sa IKNB sa umaabot.