DAVAO DEL SUR -- Misalmot ang mga kawani ug board of directors sa Davao del Sur Electric Cooperative (Dasureco) sa gipahigayong nationwide Black Valentine’s Day protest sa tanang kooperatiba sa elektrisidad niadtong Huwebes, Pebrero 14.
Si Engineer Godofredo Guya, Dasureco general manager, nagpatawag sab og press conference diin giyagyag niini ang ilang kaligutgot sa Department of Energy (DOE) human gikuhaan ang pundo sa Rural Electrification program.
Nanguna si Guya sa pagsul-ob og kolor itom nga t-shirt aron ipadayag ang ilang silent protest batok sa DOE sanglit apektado ang ilang kooperatiba sa energization program sa tanang sitio sa kabarangayan.
“This is one of the advocacy of President Digong (Duterte) but they have cut the budget for 2019,” asoy ni Guya.
Sumala ni Guya nga sa cut-off of budget, apektado sab ang Presidente nga nagtinguha nga mapadayon karong tuiga ang pasuga sa mga remote villages.
Si Guya nagbutyag nga aduna silay kopya sa suwat ni DOE Sec. Alfonso Cusi kang House Speaker Gloria Macapagal-Arroyo nga nangayo og rebokasyon sa prangkisa sa mga kooperatiba sa elektrisidad.
“Which is they are not authorized because dapat naa nay due process nga ang National Electrification Administration (NEA) can only recommend to DoE,” niya pa.
Gipasabot ni Guya nga ang silent protest sa tanang kooperatiba usa ka “strong support” sa NEA nga apektado sa nawala nga 77 porsiyentong badyet sa rural electrification.
Ang NEA adunay badyet sa 2019 nga P1.163 bilyones, kon itandi sa P1.117 bilyones niadtong 2018 aron mapasugaan ang 1,817 ka mga sitios.