SIKOP ang usa ka giingong pastor human iyang gipunay og sex ang usa ka batang babaye gikan sa nag-edad pa kini og 6-anyos hangtud nga na 14-anyos na kini.
Alas 6:30 sa buntag, niadtong Pebrero 14, gisilbi sa San Pedro Police Station ang warrant of arrest labot sa suspek nga nailhang si Edwin Villarin, 76-anyos, minyo, nagpailang usa ka pastor, residente sa Block 6, Lot 15, Phase 2, Elenita Heights, Davao City.
Mismong si Davao City Police Office (DCPO) director Senior Supt. Alexander Tagum ang mikumperma sa pagmolestiya sa suspek ngadto sa biktima.
“Sinimulan n'yang galawin yung bata when she was still 6 years old hanggang umabot na ito ng 14 years old. Ginawang sex slave ang bata,” butyag ni Tagum sa gipadalang mensahe niini sa SunStar Davao Biyernes sa hapon, Pebrero 15.
Nasikop ang suspek pinaagi sa warrant of arrest nga dunay criminal case numbers 18-01987; 18-01988; 18-01989; ug 18-1990 sa kalapasan sa Qualified Statutory Rape nga walay girekomenda nga piyansa lakip na sa Qualified Rape ug Acts of Lasciviousness nga gipagula ni Presiding Judge Dante A. Baguio sa RTC Branch 12 sa Davao City.
Nasayran nga giingong ama-ama suma pa sa biktima ang nasampit nga pastor.
Ang raiding team sa San Pedro PNP nga sila Senior Police Officer 1 Felipe Tiu Jr. ug Police Officer (PO) 1 Julius Guardian warrant officer maoy sakay sa Mobile 20 nga gi-man ni PO1 Hassim ang misilbi sa warrant of arrest batok sa suspek.
Ning kasamtangan, gidiretso na ang suspek didto sa Maa City Jail.