GITATAW ni Jhack Tepora nga wala siya’y pagdumot sa mga ningsaway kaniya human wala nadayon ang iya untang away niadtong Enero 19 sa undercard sa Manny Pacquiao-Adrien Broner bout sa Las Vegas, USA gumikan kay wala niya nakuha ang weight-limit.
Imbes magdumot o mapungot, gipasabot ni Tepora nga ang mga pagsaway nga iyang nadawat iyang gihangop nga usa ka dakong hagit aron makabangon gikan sa pagkapandol ug ipamatuod nga wala siya nagpasagad isip usa ka boksidor.
“Wala man nako gi-dibdib ang gipangsulti sa akong bashers, wala man ko nagdumot. Sa sunod nakong away, akong paningkamutan para ma-prove nako nga ma-world champion gyud ko,” matod ni Tepora sa pagpakighinabi ning mantalaan pinaagi sa Facebook messenger.
Ang gitawag og ‘El Capitan,’ kinsa adunay impresibong rekord nga 22-0, 17KOs, nakatakda untang modepensa sa iyang World Boxing Association (WBA) Interim featherweight title batok Mexican Hugo Ruiz (38-4, 33KOs) sa Pacquiao-Broner undercard apan nakanselar kining maong away gumikan kay milapas og 5.5 pounds sa 126-pound weight limit ang lumad nga Sugbuanon.
Ning bag-uhay lang, milarga sa Amerika si Tepora kauban ang iyang asawa nga si Dinah aron hinayhinay nang magsugod og training alang sa sunod niyang away.
Gipasabot ni Tepora nga mismong ang bag-ong promoter ni Manny Pacquiao nga si Sean Gibbons mao ang nagpalarga kaniya sa Amerika aron magbansaybansay sa Wild Card gym ni Freddie Roach sa Los Angeles.
Mogiya sa training ni Tepora mao ang laing Sugbuanon nga si kanhi world champion Rodel Mayol, kinsa nagbasi na sa Amerika.
“Basin tagaan ko nila’g away pero non-title. Wala pa ko kahibalo kon kanus-a, mura’g plano pa. Basta mag-training ra ko diri para ma-ready ko kon naa na koy away,” matod ni Tepora.
Giklaro sa 23 anyos nga knockout puncher nga wala siya’y planong mosaka og timbang gumikan kay nasayod siya nga kaya pa kaayo niyang kuhaon ang weight limit sa featherweight division.
Gipasabot ni Tepora nga kuwang lang gyud siya sa pagpangandam sa miagi niyang away hinungdan nga wala niya nakuha ang saktong timbang.
“Ulahi na man gud mi nakahibalo nga na-finalize na ang akong away mao tong na-ing-ato,’ asoy ni Tepora.
Ang head trainer ug igsuon ni Tepora nga si JingJing mibutyag nang daan nga nasayran ra nila nga na-finalize na ang away atol sa adlawang natawhan ni Pacquiao niadtong Disyembre 17, usa na lang ka buwan sa dili pa ang aktuwal nga tahas. (ESL)