PAGSUGOD sa election period niadtong Enero 13, subsob na ang kampanya sa kapulisan batok sa pagdala og armas de fuego pinaagi sa pagmuntar og mga checkpoints. Ginadili na ang pagdala og mga armas bisan kadtong mga lisensiyadong mga armas og adunay permit to carry outside of residence. Gawas lang kon adunay exemption gikan sa Commission on Elections (Comelec). Halos kada gabii, ang kapulisan nagpahigayon og mga checkpoints aron pagpakgang sa nga krimen.
Apan naunsa naman hinuon ang peace and order situation dinhi sa ato nga anaa man gihapoy mga krimen nga naglambigit sa armas de fuego. Si Cebu City Assistant Prosecutor Mary Ann Castro gipusil patay niadtong miaging semana. Nganong nakadala man og armas ang nagpatay kang Castro nga gun ban man kaha?
Niadtong Lunes sa buntag, tulo ang patay sa usa ka engkuwentro tali sa duha ka pamilya nga nagka-away sa Sambag 1. Misulong ang banay’ng Navales nga taga Pardo batok sa banay’ng Bacaltos sa Sambag Uno. Duha ang patay sa mga Bacaltos samtang usa sa Navales. Nganong nakadala man og mga armas ang kampo sa mga Navales?
Ang grabe ang pag-ambush sa magti-ayong Reluya niadtong Martes sa hapon sa Talisay City. Nasamdan si San Fernando Mayor Neneth Reluya samtang patay ang iyang bana nga si Kapitan Nonoy Reluya, tourism officer Ricky Monterona ug ang driver nga si Allan Bayot. Nganong nakadala man og mga armas ang mibanhig sa mga Reluya?
Gumikan kay daghan gihapon ang mga krimen nga naglambigit sa mga armas de fuego, maka-ingon ta nga di diay epektibo ang gun ban sa atong kapulisan ug checkpoints.
Di mabantayan tanan sa kapulisan ang katawhan. Di usab nila masiksik ang sulod sa mga sakyanan kay gidili man. Igo lamang sila sa plain view o visual search. Unya kining mga kriminal, wise o marunong man sab kaayo. Mas marunong pa sa mga pulis. Mas madakpan pa ang mga law-abiding citizens kay sa mga kriminal. Pero mas maayo nga pahingusgan pa sa atong mga awtoridad ang paggukod aning mga magdala og mga armas aron maminusan ang mga krimen. Gusto man kaha kita og malinawon nga eleksiyon?
(bobbygnalzaro@gmail.com)