MORAG wala man mosaler kining gun ban nga gi-imponer sa Commission on Elections (Comelec) inabagan sa Philippine National Police (PNP). Kay ngano man?

Daghan man gihapon ang gipamatay ginamit ang armas de fuego. Usa ka maestro sa Binlod Elementary School sa Argao ang gipatay.

Ang hepe sa mga traffic enforcers sa Talisay gipusil patay usab.

Ang mga sakop sa Bloods ug Crips Gang nagpinatyanay ginamit ang armas de fuego.

For updates from around the country, follow Sun.Star on Twitter

Si Joavan Fernandez, anak ni Talisay Mayor Soc Fernandez, nakadala man gihapon og armas. Ug daghan pang mga insidente nga naglambigit sa paggamit og pusil. Kon tinud-anay nga nag-implementar ang taga Comelec og kapulisan sa gun ban, wala untay insidente nga ginamit ang armas. Ang nakaparat aning gun ban, ang mga mabuot nga lungsuranon dili makadala ug armas. Apan ang mga kriminal ug badlungon sa katilingban makadala. Pagkatoytoy!

NA-AREGLO

Nisibog ang magti-ayong Jonathan ug Irene Ignacio sa ilang kaso batok ni Joavan Fernandez gumikan kay nagkasabot na sila.

Misunderstanding lang kuno ang nahitabo. Ang magti-ayon mireklamo human kalit nga nibabag si Joavan kanila sakay sa iyang sakyanan. Nasukamod intawon ang magti-ayon luwam sa ilang motorsiklo.

Pagkana-og ni Joavan sa iyang sakyanan, gitutukan pa sila sa dala niining armas dala ang pag-ingon; ‘wala mo kaila nako. Akoy tag-iya sa Talisay’. Puwerting kuyawa nila. Ang mga pulis nga miresponde wala gani magpakabana sa pagsiksik sa sakyanan sa anak sa mayor bisan kon gisultihan sila sa magti-ayon nga aduna kini armas.

Sa akong pagpakighinabi ni Jonathan anang buntag sa akong tulumanon sa DYSS Super Radyo human sa maong hitabo, nibahad gyud siya nga ipadayon ang kaso aron maleksiyon si Joavan.

GIBAYRAN NA POD?

Ako pa gani siyang gikomedyahan nga basin mosibog siya kay mamayad ug manghatag og house and lot si Mayor Soc sa mga reklamante bugti sa pagsibog sa mga kaso nga gi-atubang sa iyang pinalanggang anak. Mi-ingon siya nga ‘bahala na Super Bob, amo gyod ning ipadayon kay among kinabuhi ang namiligro ani’.

Sus, niadtong miaging adlaw, nahipughat nalang ako sa dihang akong nahibaw-an nga misibog na ang magti-ayon human kini mipirma og affidavit of desistance. Unsa man nabayran na pod sila? Kay mao man kini ang gihimo ni Soc sa ubang gika-atraso ni Joavan. Iyang gihatagan ug balay og yuta samtang ang uban iyang gipatrabaho sa City Hall. Mao nang mi-abuso ug maayo kanang iyang “demonyong” anak.