DID-AN sa kapulisan ang mga menor de edad nga makaapil sa disco sa kapistahan sa Brgy Mactan karong Sabado sa gabii, Pebrero 16.
Mao kini ang gipaniguro ni Chief Inspector Miguel Andeza, hepe sa Mactan Police Station, aron kalikayan nga dunay kagubot.
Ang disco nga ipahigayon sa Liberty Shrine maoy magsilbing highlight sa mga kalingawan sa kapistahan sa barangay pahinungod sa ilang patron, Senior Sto. Niño.
Matod ni Andeza nga alas 11 sa gabii ilang ipatuman ang curfew aron masigurong way mga menor de edad nga mosuroy sa discohan.
Ang mga menor nga ilang makit-ang magsuroy-suroy o anaa pa haduol sa palibot sa discohan ilang “i-rescue.”
Ang Mactan Police Station nibutyag nga naghitak sa ilang area of responsibility (AOR) ang mga menor de edad nga nag apil-apil og mga grupo o mga gang. Ang uban niini di mga taga Brgy. Mactan ug motuyo lang og anha sa dapit aron magsuroy-suroy ug mag-estambay sa mga hilit nga lugar.
“Mga 10 o’clock mo inform na ta sa mga minors nga naa sa kilid-kilid sa pag-uli, pag 11 pm na automatic rescue na na sila nato,” matod ni Andeza.
Samtang gawas sa menor de edad, estrikto ra usab nga ipatuman sa kapulisan nga di pwedie mag-inom sulod sa discohan. Kini aron kalikayan usab ang kagubot.
Moabot sa 30 ka mga pulis ang mobantaysa kalihukan.
“So far, kon anytime tan-aw nato dili kaya sa atong kuan (personnel), naa may atoang City Mobile Force Company CMFC. Naa pa tay Special Weapons and Tactics (SWAT),” pagpasabot ni Andeza kon nganong wala sila mangayo ug augmentation sa LCPO Headquarters. (GCM)