MALANGAY ang pagpasaka og kaso batok sa unom ka mga suspek sa pagbanhig kang San Fernando Mayor Lakambini “Neneth” Reluya ug mga kauban.
Pamilya sa duha nga nangamatay nangahadlok sa pagkiha, wa moluwat og pinanumpaang pamahayag.
Matod ni Police Regional Office (PRO) 7 Director Chief Supt. Debold Sinas nga ang paryente nilang Allan Bayot ug Ricky Monterona iyang gipaadtoan sa mga imbestigador.
Apan ang pamilya nilang Bayot ug Monterona ninghangyo nga di sila mopasakag kaso, pulis na lang ang bahala nga mohimo.
Sila si Bayot ug Monterona namatay uban kang Association of Barangay Councils (ABC) president Ricardo "Nonoy" Reluya, bana sa mayor.
Naandam na unta sa Special Investigation Task Group ang affidavit ni Mayor Reluya ug sa staff niini nga si Giovanni Perez nga magsilbing saksi.
Apan tungod sa pagdumili sa duha ka mga pamilya nga nangahadlok, sila naproblema.
Sila gipasabot sa kapulisan nga ang tumong ug tuyo sa pagpapirma kanilag dokumento mao ang pagpasaka og kaso.
Abagan lang sila nga madungan ang pag file niini ngadto sa korte.
Una nang nipahibawo si Cebu Provincial Police Director Sr. Supt. Manuel Abrugena nga sulod ning semanaha, ilang ipasaka ang kaso ngadto sa piskalya human migawas ang resulta sa ballistic ug cross matching sa armas ni Jerome Labitad.
Kon padayon nga magdumili ang pamilya sa duha nga naapil sa pagkamatay , ipasaka na lang sa kapulisan ang kaso ngadto sa korte.
“Kay karon akoang gipaadtoan kadtong mga koan mga namatyan. Estorya nila nga bahala na daw ang police mga ingon ana,” matod ni Sinas sa mga tagdumala.
Gitinguha nila nga mausa na ang tanang kaso nga ilang iduso sa piskalya nga giandam na sa SITG Reluya.
Dugang niya nga di na kinahanglan nga motumbok sila sa mga suspek sa ilang affidavit tungod kay aduna may mga saksi.
Ang tumong ug tuyo sa dokumento pag matuod lang nga mopasaka silag kaso.
Silang Labitad ug Felix Abacajan gitumbok nga prime suspect sa ambush. (AYB)