MODUOL ang Commission on Elections (Comelec) Cebu provincial office sa mga magtutudlo sa mga pribadong eskwelahan kon way dugang magtutudlo sa publikong tunghaan nga moserbisyo karong eleksyon sa Mayo sa lungsod sa San Fernando.
Nanginahanglan og 177 ka mga electoral boards ang maong lungsod sa 21 ka mga polling place.
Apan 20 ka mga maestra ni-withdraw ug di na moserbisyo tungod sa kahadlok sa ilang seguridad.
“Last Saturday, nag briefing ta ug we gave assurance to the EBs that they will be secured this coming election. Although, di nato malikayan, as human as we are, naa gyud tay kahadlok. Naa tay mga 20 teachers as per yesterday nga ni withdraw na,” sigon ni Cebu Provincial Election Supervisor Atty. Jerome Brillantes.
Apan di kini ikaalarma para nila tungod kay makaya pa nila ug aduna pay daghan nga EBs nga andam moserbisyo.
Aduna usab silay mga lista sa mga EBs nga ningserbisyo sa miagiang eleksyon ug kini mao ilang giprayoridad sanglit anaa na kini kasinatian.
Samtang si Police Regional Office (PRO) 7 Director Debold Sinas nipasalig nga mopadala siya og dugang mga pulis sa San Fernando.
Papatrolyahan ug pabutangan usab niya og checkpoints ang kabukiran sa lungsod aron mapugngan ang armadong mga tawo nga mosamok sa eleksyon. (Jolissa Mae Taboaba, Usj-R Intern & AYB)