KAPIN sa P30 mil ang nawala human gitulis ang usa ka lotto outlet niadtong Domingo mga alas 4:30 sa hapon saÿDamilag, lungsod sa Manolo Fortich, Bukidnon.

Gipusil pa ang kahera nga mao si Catalina Arga, 54, balo, sa susamang dapit.

Si Senior Police Officer 3 Rodenio Doctor sa Manolo Police Station nibutyag sa Sun.Star Superbalita nga posibleng gisundan ang biktima niadtong tungora human migawas makadali gikan sa opisina sa lotto oulet ug nagsilhig pa niadtong tungora.

Tulo ka mga suspetsado nga walay tabon ang nawong ang miduol sa kahera ug mideklarar og tulis dungan tion og pistola ngadto sa biktima.

Gipangayo ang halin sa lotto apan nidumili sa paghatag si Arga hinungdan ngaÿgipusil ang ulo niini makaduha ka higayon ug nadala ang giba-banang kapin P30 mil.

Nagbuy-od na lamang nga nakita ang biktima nga nagkadugo human dali nga misibat ang mga suspetsado.

Matud ni Doctor nga adunay nakakita sa mga suspetsado nga nag-ilis og sinina human sa hitabo sa kasagbutan nga bahin sa maong dapit aron dili na kini maila.

Adunay nay gitumbok nga grupo sa mga suspetsado apan dili pa ikabutyag sa kapolisan ning panahona labina nga gihimo ang operation sikop ngadto kanila.

Samtang si Arga gidala ning panahona sa Northern Mindanao Medical Center nga kritikal ang kondisyon human maayong pagkaigo sa bala ang ulo gamit ang wala matinong pistola.