Dear Noy Kulas,
Tagoa lang ko sa ngan nga Emma. Minyo ko ug dunay duha ka mga anak nga dagko na.
Buwag mi sa akong bana for six years na. Ako na lang siyang gipasagdan human nako masakpi nga nimabdos ang iyang kabit. Nangayo hinuon siya og pasaylo nako pero ako siyang gipalayas aron magtipon na sila sa iyang kabit.
Ang mga bata di unta gusto nga mabuwag namo ang ilang papa kay bisan nangabit siya, nag-support gihapon siya namo ug pinangga gihapon niya ang among mga anak. Karon, nasakit siya, kanang mananakod ug gusto sa iyang kapuyo nga molayas siya sa balay aron mopauli siya sa amoa.
Wa siya mo-contact nako kay didto siya sa among mga anak nakig-estorya. Naluoy niya ang mga bata pero ako, naa gihapon ang akong kalagot ug kahiubos niya. Please tambagi ko unsay akong angay buhaton karon. Naglibog na ko.
EMMA
Em,
Six years na diay ang nakalabay? Wa pa gihapon ka maka move on? Bitaw, naa ra nimo ang tanan, ang pagpasaylo ug paghikalimot sa tanan o ang pagpabilin sa imong kasuko ngadto kaniya. Kining tanan nagdepende ra nimo.
Kon ang inyong mga anak nakapasaylo sa ilang amahan, pangutan-a ang imong kaugalingon kon nganong di mo man mahimo ang pagpasaylo kaniya human makalabay ang unom ka mga tuig? Wa diay niya gani kalimti ang iyang responsibilidad sa pagka amahan sa inyong mga anak kay nagsuporta man siya niini. Basin gani nagsige sila og kita nga wa ka lang makahibawo.
Bisan tuod og lainlain ang inyong level sa kasakit kay ikaw man ang asawa ug direktang giluiban, sa nakalabay nga unom ka mga tuig imo na untang nahinayhinay ang pagpasaylo kaniya aron maka move on. Kanang pagpasaylo nga let go sa kasakit, apan magkat-on og leksyon. Both of you can remain friends, not necessarily as husband and wife. Kon ikaw naluiban, bug-at ang imong paminaw kon di ka makapasaylo kaniya hangtod karon.
Sayri unsa ang iyang sakit, unsa ka mananakod. Kon mahimo rang mopuyo siya sa inyoha apan likayan ninyo nga makapanakod siya, nganong imo man siyang balibaran? Until now, magtiayon gihapon mo ug siya ang amahan sa inyong mga anak. Bisan tuod wa na siya sa inyong poder, gipanindugan niya ang iyang pagka amahan sa inyong mga anak. Bisan kana na lang ang imong huna-hunaon.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com