NAGSUGOD na sa ilang pagpangampanya ang mga kandidato pagka senador.
Sa gipaabot nang daan ilang giladlad ang mga plataporma ngadto sa katawhan nga sa panahon sa kampanya gitawag nila og haring lungsod.
Bisan niadtong panahon sa kolihiyo atol sa pangampanya sa Supreme Student Council kun di hari ang mga botanting tinun-an gitawag og mabuot nga lungsoranon, usahay paglaum sa nasod og bisan unsa nalang agi og pagyukbo sa ilang katakus sa pagpili sa mga haligi sa student government.
Sa politika sa atong nasod mao sab ang gihimo sa mga politiko.
Gawas sa pagpangayo og katahuran kana gyung ibayaw ka nga labing halangdon o pinaka gamhanan isip botante.
Naa ba guy mangampanya nga nga ipakaubos nila ang ilang gipangampanyahan? Wala.
Front seat gyud pirme ang mga tawo nga manambong sa rally. Mao nga ning panahona way lalis kanunay tang makadungog sa pulong nga haring lungsod.
Ang pangutana, tinuod ba ta nga hari? O ang nangampanya kong modaug na maoy mogawas nga hari.
Ang haring lungsod sa panahon sa kampanya maisip nalang nga ulipon kay magsige naman lang og sunod sunod sa ilang gusto. Kana bitawng giingon sa uban nga makaila lang ning mga politiko sa mga botante kong panahon sa kampanya. Kong modaug na ambot kamao pa bang molingi.
Tungod kay magpa pili masiri siri og panglamano. Kong makatungtung na sa puwesto ambot og asa pangitaa.
Kong naa kay tuyo ingnon sab ka sa iyang mga alipores nga busy, naay miting ug bisan unsa nalang nga katarungan.
Tipik lamang kini sa mga hilisgutanan nga angay patalinghugan ning panahon sa kampanya.
•••
Taliabot na sab ang kampanya para sa lokal nga piniliay.
Gani taudtaod na nga nakabuylo ang pagpanglamano ug pulongpulong nga gihimo sa mga kandidato diha sa mga sitio.
Sa di pa ta makalimot, pasuwaya ra gud na sila pag panglamano sa mga oras sa buntag nga lisod kaayo ang sakay.
Ang akong gipasabot adto sila nanglamano daplin sa karsada diin nagbaha ang daghang pasahero nga nagpaabot og dyip nga masakyan.
Unya ipa-isplikar nila nganong ingon niini ang sitwasyon matag buntag nga tanan. Kamo nga apil anang inilogay sa sakay, basin gusto mong mangutana - unsay natampo sa mga re-electionist sa pagsulbad ning maong problema.
Wa man na sila makasinati ana kay naa may plate number nga pula nga kanunayng giparada sa ilang pinuy-anan.
Pero sigurado ko nga naka kita na sila ning problemaha. Nakahibalo na ta unsay binulay-og nilang tubag ning isyuha.
Ang ato kanang inantigo nga husay aron masabtan nato ang tinuod nga isyu.
Kitang nag-antos pagpinaabot og masakyan di kaha maayong maghugpong sab aron mapalanog ang atong sentemento.