NABALAKA na ang City Health Office sa Dakbayan sa Lapu-Lapu kay gipilo og sobra sa katulo ang mga kaso sa dengue sa Dakbayan ning unang duha ka mga buwan sa 2019.
Sa miaging tuig, mokabat lang sa 56 ang mga kaso gikan sa Enero ngadto sa Pebrero. Apan wa pa gani mahuman ang Pebrero, sobra na makaupat nga gipilo ang mao nga mga kaso sa makamatay nga sakit.
Ang dengue fever dala sa usa ka matang sa lamok. Ang lamok mangitlog diha sa tubig. Ang itlogan sa mga lamok nga nagdala sa virus sa dengue fever kasagaran limpyo.
Kon tubig ang itluganan sa lamok, di siya makasanay o makadaghan kon way tubig. Apan imposible kaayong way tubig sa palibot, labina kon ting-uwan o dunay drainage system sa duol.
Grabe na ang information drive ug pag-edukar sa health officers sa publiko kalabot sa pagkombate sa dengue. Giedukar ang katawhan kon unsay buhaton aron di makakatap kining mao nga sakit.
Limpyuhan ang palibot sa kabalayan gikan sa posibleng maitlugan sama sa mga planggana, botelya, ligid sa sakyanan, mga dahon sa tanom nga mosala og tubig ug uban pa. Kinahanglan manglimpyo kada adlaw sa palibot.
Apan kadaghanan sa publiko dunay mentalidad nga reaksyunaryo lang. Kana ganing mohimo og lakang kon duna nay sitwasyon nga mitumaw. Sama aning pagkuyanap sa dengue fever, mo-react lang ang katawhan kon naa nay daghang nangasakit.
Kon way daghang masakit, way magpakabana sa pagpanglimpyo ug paghimog mga lakang aron di maigo niini. Ang nakapait, kinahanglan pang sultihan sa mga kawani ug opisyal sa kagamhanan nga manglimpyo sa palibot una pa molihok. Maorag lansang nga kinahanglan pang dukdokon aron modulot.
Ngano diay, di mahimong batasanon sa matag usa ang kanunay nga pagpakabana ? Di huwaton nga duna pay mamatay nga sakop sa pamilya.