HUMAN sa tulo ka buwan nga pagpakigbugno aron maluwas sa makuyaw nga kahimtang, mouli na sa Z “The Dream” Gorres sa Sugbo gikan sa Estados Unidos.

Si Gorres kinsa usa sa mga boksidor nga naila sa tibuok kalibutan tungod sa iyang kalantip, kahanas ug kadangog ibabaw sa ring, nakahatag og igong dungog dili lang Sugbo kon dili sa tibuok Pilipinas.

For updates from around the country, follow Sun.Star on Twitter

Siya gihulagway nga usa sa mga pinakamaayong boksidor nga naugmad sa habagatang bahin sa nasod ug gituohan nga makahatag og world title alang sa nasod.

Gadala sa monicker nga “The Dream” sa pagtuo nga siya ang usa sa mga makahatag og katumanan sa damgo sa usa ka boksidor.

Apan sa daw wa modap-ig kaniya ang kahigayonan. Niadtong Nobiyembre 13, 2009 sa usa niya ka away didto sa Amerika, pipila na lang ka gutlo, mataak na unta niya ang laing ang-ang paingon sa pultahan sa kampiyonato.

Apan sa katapusang mga segundos usa ka mapintas nga kumo sa Colombian nga si Luis Melendez ang mitay-og sa iyang utok nga hapit gayud makakalas sa iyang kinabuhi.

Gidala sa hospital, ug sa dihang gideklarar nga anaa sa kritikal nga kahimtang ang “The Dream,” mga pag-ampo ug pagpanampit sa Kahitas-an maoy gipanawagan sa mga nagdumala ni Gorres - ang ALA gym.

Tuod man tudo usab ang pagsanong niini, ug giuwan sa kinasingkasing nga mga pagtabang si “Z” nga gani pipila ka mga igsuon natong Pinoy didto sa Estados Unidos miabag usab kaniya.

Sa panaghugpong, milampos si Gorres sa pagpakigkombati batok sa naghudlat sa iyang kinabuhi. Di na man tuod siya makabalik sa pamoksing, apan wa kini magpasabot nga napapas na ang katinud-anan sa iyang damgo.

Kita sayod nga ang Kahitas-an adunay laing plano alang kaniya ug ning higayona mao na ang kalampusan sa iyang mga damgo.

Welcome home, Gorres. Kami saludo nimo!