USA ka lalaki ang namatay human mabanggai sa usa ka pampasaherong van ang iyang gisakyang motor didto sa Kilometro 39, National Highway, Barangay Ising, lungsod sa Carmen, Davao del Norte, Dominggo sa gabii.

Giila ang biktima nga mao si Carmelito Cepe, hamtung ang panuigon, ug molupyo sa Purok 1, Barangay Ising, sa susamang lungsod.

Sa report gikan sa Davao del Norte Police Provincial Office nasayran nga nahitabo ang aksidente alas 6:15 sa gabii.

Sakay sa iyang Suzuki Raider nga motor ang biktima samtang padulong siya motabok sa national highway sa maong dapit.

Apan kalit lamang nga miabot ang naghaguros nga pampasaherong van nga dunay plate number KCM-283, gimaneho ni Nonito Remotin, ug molupyo sa siyudad sa Mati.

Tungod sa kusog nga dagan wa na nakatamak sa preno ang driver sa van ug mibangga gyud sa motor nga gisakyan sa biktima.

Nilagpot ang biktimang si Cepe resulta sa pagkahiagum niya og grabeng mga pangos ug bun-og sa nagkadaiyang parte sa kalawasan.

Gisuwayan pa og dala sa Carmen District Hospital ang biktima apan gideklara na kining dead on arrival.

Ang driver sa van boluntaryo nga mitahan sa iyang kaugalingon ngadto sa mga otoridad.

Kasong reckless imprudence resulting to homicide ang gihikay sa kapulisan batok sa driver sa van. (Marvin Pineda)