HANGTUD karon wala pa mailhi ang patay nga lawas sa usa ka babaye nga gitipi sa siyudad sa Cotabato.

Base sa taho gikan sa Cotabato City Police Office nga banda alas 6:00 sa buntag, Pebrero 16, nasiplatan sa mga sibilyan ang wala nay kinabuhi nga babaye nga gilabay kilid sa tulay sa Kakar River.

Dali-dali nga niresponde ang kapulisan nga gipangulohan ni City Police Director Senior Superintedent Willie Dangane ug gihiling ang patay nga lawas sa babaye apan walay nakuha nga kagamitan, bisan pitaka ug ID aron unta mailhan kini.

Biktima nagpangidaron og gikan sa 20 hangtud 25 anyos, puti-on ang pamanit, taas og buhok, 5/4 ang gibanabana nga gitas-on, nagsuot og itom nga t-shirt ug nagsul-ob og pantalon.

Nagtuo si Dangane nga ang dalaga biktima sa pag-salvage ug gidagmalan pa kini una gipatay. Nakita nga dunay mga samad pinusilan ug dinunggaban sa nagkadaiyang parte sa lawas sa biktima ug gituok pa gamit ang charger sa cellphone.

Gituohan nga dako ang kasuko sa mga suspek gumikan sa brutal nga pagpatay sa dalaga.

Matud ni Esmael Tampra, nagpuyo sa Kakar, nga dunay sakyanan silang namatikdan nga mihunong sa ilang dapit alas 3:00 sa kaadlawon ug posibling gilabay lang didto ang patay nga lawas sa dalaga.

Ang lawas sa biktima gidala sa Angel Funeral Homes samtang nagpadayon ang imbestigasyon sa mga otoridad. (Edgardo Fuerzas)