GATUSAN ka mga pamilya ang mihiklin gumikan sa katag-katag nga engkuwentro sa magka-away nga pamilya sa probinsiya sa Cotabato.
Sa report gikan sa Cotabato Police Provincial Office nasayran nga alas 4:00 sa hapon, Lunes, nag-abot ang grupo nila Kumander Daud sa Moro Islamic Liberation Front ug Kumander Magalona Ampatuan sa Moro National Liberation Front sa barangay Salat, President Roxas nga miresulta sa binakbakay sa duha ka mga grupo.
Gisulti ni Cotabato Police Provincial Director Senior Superintendent Norberto Batislaong nga away sa yuta ang ugat sa kagubot.
Dugang niya nga may napatay ug naangol sa padayong engkwentro sa magka-bangi nga pamilya.
Gidugang ni Batislaong nga pulos armado sa mga tag-as nga matang sa armas ang grupo nila ni Daud ug Ampatuan.
Gihimo na sab ang negosasyon aron pakalmahon ang duha ka mga pundok.
Gipun-an na sab ang puwersa sa militar ni 602nd Brigade Commander Colonel Alejandro Estomo aron ipatuman ang hugot nga seguridad sa President Roxas.
Milihok na sab si Cotabato Governor Jesus Sacdalan aron resolbahon ang bikil sa duha ka mga grupo ug matabangan ang mga sibilyan nga namakwet ug temporaryong nanimuyo sa luwas nga dapit ug tulunghaan sa lugar.(Edgardo Fuerzas)