HUMAN gisaulog sa katawhan ang adlaw sa mga kasing-kasing kun Valentine's Day, duha na ka mga tawo ang naghikog gumikan kay nasamaran ang ilang kasing-kasing dinhi sa siyudad sa Davao.
Base sa journal sa Davao City Police Office (DCPO), ang uwahing nagpakamatay mao si Pedro Hinampas Jr., 39, minyo, nagpuyo sa Sitio Pangi, Barangay Mandug, distrito sa Buhangin.
Si Police Officer 2 Carlos Cacho, imbestigador sa Buhangin Police Station, nagbutyag sa iyang spot report nga napalgan ang biktima nga nagbitay sa punoan sa mangga sa alas 9:00 sa buntag niadtong Lunes.
Matud ni Cacho nga ang pagpakamatay sa biktima nadiskubrehan sa iyang igsuong lalaki nga si Leonardo Hinampas kinsa maoy nagpahibalo sa kapulisan sa Buhangin.
Ang biktima gidudahan nga dunay dakong suliran nga siya lang ang nasayud mao nga nakahukom siya nga magpakamatay aron matibway ang tanan.
Sayo niini, nagpakamatay sab sulod sa iyang boarding house ang usa ka call center agent sa Sutherland Global Services Philippines atol sa pagsaulog sa Valentines Day niadtong Dominggo didto sa Cabrera Boarding House, Arellano Extension, siyudad sa Davao.
Napalgan nga nagbitay sa pisi sa alas 7:30 sa gabii mao si Leslie Jean Grancho, 22, lumad nga taga Bermuda, Tagum City.
Si Grancho napalgan nga nagbitay sulod sa iyang lawak pinaagi ni Paul Pogoso kinsa Mark June Femis, hinigugma sa namatay, nga susihon ang lawak niini gumikan kay dili motubag ang dalaga sa iyang tawag sa cellular phone.
Ang duha ka mga nagpakamatay atua karon gihaya sa Angel Funeral Homes samtang giandam na sa ilang kabanay nga ilang katapusang pahulayan. (AD)