USA ang nakabsan sa kinabuhi samtang laing tulo ang kritikal human giluba sa managlahing hitabo niadtong Domingo atol sa pagsaulog sa Valentines.
Dead on arrival sa Northern Mindanao Medical Center (NMMC) ning siyudad sa Cagayan de Oro si Bonifacio Baer, 26, ulitawo, lumad nga taga siyudad sa Valencia, Bukidnon human giluba niadtong Sabado mga alas 11:00 sa gabii sa Marvilla Beach, lungsod sa Opol, Misamis Oriental.
Kauban sa biktima ang iyang uyab niadtong tungora alang sa night swimming dihang nananghid nga aduna paliton sa gawas nga bahin.
Natingala ang uyab dihang dugay nakabalik ang biktima apan pagtan-aw niini sa kilid nga bahin nakita na lamang nga nagbuy-od ug naligo sa kaugalingon nga dugo ang biktima nga gikatahong gitabangan ug natripan sa mga batan-on.
Ubay-ubay nga samad ang naangkon ni Baer labi na sa kilid nga bahin sa dughan, tiyan ug sa likod nga bahin.
Gidali pagdala sa uyab ang biktima sa NMMC apan dead on arrival nga gideklarar sa doktor.
Gituohang daghan sa dugo ang nawala sa biktima hinungdan sa hinanaling kamatayon.
Ang Opol Police Station padayon pa sa paghimo og dugang imbestigasyon aron pag-ila ug pagsikop sa suspetsado.
Samtang kritikal ang kondisyon ni Eric Lugsanay, 19, ulitawo, lumad nga taga Brgy 19, siyudad sa Gingoog, Misamis Oriental.
Kini human giluba sa wala mailang suspetsado samtang nagdisco niadtong Sabado mga alas 11:00 sa gabii.
Nasayran nga igo lang nga niaparta ang biktima sa away sa iyang higala dihang kini ang giluba sa mga suspetsado.
Tulo ka mga samad sa tiyan ang naangkon sa biktima nga gidala sa balay tambalanan sa maong dapit apan giduso sa NMMC ning siyudad.
Sa laing bahin giluba sab si Ricky Otadoy, 41, minyo, taga Nazareth sa suspek nga iyang pag-umangkon nga mao si Jun Otadoy.
Nagsalod og tubig ang biktima kagahapon mga alas 8:20 sa buntag dihang nagkabikil sa pag-umangkon sa walay igong rason.
Deretso nga giluba ang biktima gamit ang kutsilyo hinungdan sa pagkaigo sa tiyan niini. Gidala gihapon ang biktima sa NMMC nga kritikal ang kondisyon.
Ikaupat nga biktima mao si Alejandro Capito, 54, taga lungsod sa Talakag, Bukidnon kinsa giluba sa adunay deperensya sa pangisip nga nailhang si Dagol Daumar.
Nahitabo ang pagpangluba kagahapon mga alas 8:00 sa buntag samtang naglimpyo sa gimanehong van ang biktima.
Kalit nga miduol kaniya si Daumar hinungdan nga gibadlong niini apan kalit nga nasuko ang suspek ug deretso nga giluba ang biktima.
Kritikal ang konsdisyon ni Capito ning panahona sulod sa NMMC labina nga maayong pagkaigo sa wala nga bahin sa dughan niini.