GIHANGOP sa mga Sugbuanon nga sama o kaha labaw pa sa usa ka world boxing champion si ALA boy Z “The Dream” Gorres sa iyang pagbalik sa Sugbo kagahapon gikan sa usa ka milagrusong pagkaalim gikan sa duha ka mayorihiyang operasyon sa utok.
Sa iyang paghiabot sa Mactan International Airport, si Gorres nakahilak sa iyang nakita – nagpunsisok ang mga tawo nga ningsugat kaniya lakip na niini ang iyang upat ka mga anak ug mga silingan sa Brgy. Ibabao, Mandaue City.
Kauban ni Gorres sa biyahe gikan sa Manila mao ang iyang asawa nga si Datches, ALA Promotions president Michael Aldeguer, ALA Promotions vice president Dennis Cañete, Dr. Ben Calderon ug iyang asawa nga si Sofia.
Gibanabanang kapin sa 200 ka mga tawo ang ningsugat kang Gorres sa airport.
Gikan sa airport, si Gorres mideretso sa Ibabao Barangay Hall pinaagi sa convoy (mga kapin sa 50 ka sakyanan) alang sa usa ka hamubong programa nga giandam ni Brgy. Captain Jun Del Mar inabagan ni Mandaue Mayor Jonas Cortes.
Dayon milahos si Gorres sa Patio Isabel Restaurant sa Banilad City aron ikahimamat ang mga sakop sa local media.
“Nagpasalamat ko sa media, sa akong mga silingan, sa Aldeguer family nga naa gyud permi nga nagsuporta nako,” batbat sa 27 anyos nga si Gorres.
Gipasalamatan sab ni Gorres ang tanang mga ningtabang kaniya sa Las Vegas hilabi na si Dr. Calderon nga wala gyud molugak sa pagsuporta kaniya human sa operasyon hangtod na nga nakauli siya dinhi sa Sugbo.
“I just want to let you know that we’re here to deliver Gorres alive. We’re the adopting family of Z,” matod ni Calderon, kinsa mao gyu’y nag-atiman kang Gorres sa Las Vegas hilabi na sa medical ug pinasyal nga aspeto.
'Miracle kid'
Gihulagway ni Dr. Calderon si Gorres nga usa ka “miracle kid” tungod sa pagkaalim niini gikan sa insidente nga alang kaniya dili makaya sa usa ka ordinaryo lang nga tawo.
“This guy is a miracle kid. He really did improve a lot. Last Friday, he started walking by himself with a walker. We can see how determine he is,” batbat ni Dr. Calderon.
Gipasabot ni Dr. Calderon nga kon dili usa ka atleta nga sakto sa kondisyon si Gorres, hayan nagtuo siyang dili gyud kini makasugakod sa nahitabo kaniya.
Si Gorres nakuyapan ug gidala sa ospital human sa iyang unanimous decision nga kadaugan batok kang Colombian Luis Melendez niadtong Nobiyembre sa Las Vegas.
“Seguro kon ordinary person lang, baka iba na ang iuuwi ko rito, hindi na si Gorres,” dugang ni Dr. Calderon.
Sa banabana ni Dr. Calderon, molanat pa’g mga unom ka buwan ang rehabilitasyon ni Gorres una kini hingpit nga maka-recover.
Mga P26 milyunes
Gitataw ni Dr. Calderon nga miabot sa $562,000 o mga P26 million ang bayranan ni Gorres sa University Medical Center sa Las Vegas hinungdan nga nagkinahanglan gyud kaayo kini’g panabang.
Gipasabot ni Dr. Calderon nga ang Philippine Medical Association (PMA) sa Nevada, nga adunay kapin sa 200 ka mga sakop, nag-amot-amot ug nagpahigayon sab og fund raising aron tabangan si Gorres.
“We are requesting several organizations to join us,” matod ni Calderon.