USA sa mga suspek sa pagpusil-patay sa magtutudlo sa lungsod sa Argao, Cebu nga nasikop sa kapulisan gipakita na kagahapong adlawa ngadto sa mga media samtang, samang higayon, ang kauban laing tulo nailhan na usab.
Kagahapong adlawa ang mga responsbali pormal nang gipasakaan og kasong murder.
Si Senior Supt. Erson Digal pangulo sa Cebu Provincial Police Office niilasa ilang nadakpan nga si Joel Alforque, 32 anyos, taga barangay Valencia, siyudad sa Carcar.
Matod pa, si Alforque, kinsa ex-convict, niadto pang Sabado sa hapon nasikop, apan wala lang una kini ipahibawo ngadto sa mga tigbalita tungod kay nagpadayon pa ang ilang hot pursuit operation.
Atol sa pagsikop ni Alforque nakuhaan og usa ka .357 ngaa adunay tulo ka mga bala.
Hinuon nihimakak kini sa pasangil ug matod niya nga tinuod nisakay kaniya ang tulo ka mga tawo nga pulos iyang nakaila sa dihang didto pa siya sulod sa bilanggoan.
Apan matod niya nga igo lang kining nagpahatod niya sa rotunda sa ilang siyudad.
Nagkanayon si Alforque nga nakadungog siya nga moadto ang tulo sa Argao.
Matod niya nga nakadungog nalang siya sa report nga aduna nay gipatay nga usa ka magtutudlo.
Si Senior Supt. Erson Digal niila sa kuyog ni Alforque nga sila si Arnel Cabungcal, taga barangay Poblacion-3 nga nasulod na sa CPDRC, ug gitumbok nga maoy nipusil ni Duran.
Samtang ang laing duha nga maoy nagsilbing lookout mao sila si Marcelo Navarez, ug Jeffy Cavan, pulos taga lungsod sa Aloguinsan.
Nagkanayon si Digal nga bisan ug nihimakak ang ilang nasikop nga apil sa krimen apan ang ilang nakuhang mga witness positibong niila ni Alforque ug sa lain pang tulo ka mga responsabli human gipakita sa mga saksi ang hulagway sa tulo.
Kahinumdoman niadtong niaging semana usa ka Romeo Duran, 52 anyos ang panuigon, ug magtutudlo sa Binlod Elementary School ang gisulod sa usa ka wala mailhing tawo dayog pusil patay.
Ang pangulo sa Police Regional Office (PRO-7) Chief Supt. Lani-o Nerez niingon nga nalipay siya sa resulta sa imbestigasyon sa kapulisan nga nailhan na ang mga responsable.
Apan mas labing maayo nga ilang masikop ang mga responsable.
Niini laing team sa kapulisan ang gitukod aron motabang pagpangita sa tulo ug matino ang motibo sa pagpatay.
Kagahapon sa hapon si Senior Supt. Digal nipahibawo nga kasong murder ang ila nang ipasaka batok sa upat samtang si Alforque pasakaan usab og kasong paghupot og illegal nga armas.(DRT)