Hero's welcome

HUMAN sa malampuson nga misyon didto sa Thailand, mi­ba­lik gilayon kagahapon dinhi sa Pili­pinas ang bag-ong World Boxing Or­ganzation (WBO) bantamweight champion Marlon Tapales uban sa iyang inahan, trainers ug pipila ka mga piniling media.

Kon way kalangan o kakulian, ang grupo ni Tapales miabot sa NAIA Terminal 3 sa alas 2 sa hapon diin siya gipaabot nga himamaton sa mga sportswriters sa dili pa kini mopaingon dinhi sa Sugbo sa alas 4 sa hapon.

Nahikuyog ni Tapales mao ang iyang mama nga si Maria, iyang trainers nga sila si Fernando Ocon, Brix Flores, Tito Abella ug Philboxing.com owner Dong Secuya.

Karong adlawa, mogikan si Tapa­les paingon didto sa iyang probinsiya sa Lala, Lanao del Norte kuyog ang iyang mama ug gipaabot nga sugaton og hero’s welcome.

Ang manager ni Tapales nga si Rex Wakee Salud ug ang asawa niini nga si Elvira midiretso na kagahapon paingon didto sa Singapore alang sa ilang hamubong bakasyon ug gika­takdang mouli sa Martes.

Dala ang moniker nga “The Night­mare” si Tapales mipaundang ni two-time world champion Pungluang Sor Singyu sa Thailand sa ika-onse ka round aron langkaton ang world title didto sa Ayutthaya Park sa Thailand.

Mabulokon ug kulba dalang kahinam ang maong kadaugan sang­lit gawas nga inilog ang Sor Singyu tungod sa ka beterano niini atoa pa kini ipahigayon sa ilang dapit sa Thailand.

Misamot ang pagduda sa pipila ka mga Pinoy nga misaksi sa maong away sa dihang kaduha gyud matumba si Tapales sa fifth round. Sayo nga nahitabo ang unang pagkatumba og pipila lang ka segundos nasundan sab dayon kini.

Apan dala ang kaisog ug deter­minasyon, si Tapales nakalahutay ra sa maong round ug nabalikan sa hangin sa sunod nga mga hugna.

Nakabantay nga daw sa nahut­dan sa hangin sa ikaunom ka round ang Thailander, ang 23 anyos nga Tapales hinayhinay nga miatake sa bodega ni Sur Singyu ug ang usa ka igo sa apapangig maoy nakapahagsa sa Thailander.

Way hunong ang pag-asdang ni Tapales ngadto ni Sur Singyu ug sa ikanapulo nga round mipabuhagay og usa ka solidong wala nga gisundon sa tuo nga kombinasyon maoy nakapa groggy og maayo sa Thailander.

Sa ika-onse nga round, wa na makalihay pa si Sur Singyu sa pag­buhi sa makusog nga left straight ni Tapales nga maoy naghatdo kaniya ngadto og balik sa kanbas ug ning higayona wala na kini makabarog pa.

Matod ni Salud nga gusto pa unta sa mga trainers ni Sur Singyu nga pasukolon pa kini apan dili na kini mahimo pa tungod kay maayo na mang pagkabuak ang apapangig niini.

Sa kadaugan, si Tapales aduna na karoy 29 ka daog, duha ka pildi ug 12 ka knockouts.

Ang kalampusan nagdugang sa Pilipinas og laing kasamtangang world champion sa natad sa pamoksing. Si Tapales nahitapo na nila karon ni WBO light flyweight king Donnie Nietes, IBF flyweight champion Johnriel Casimero ug WBO super bantamweight champion Nonito Donaire Jr.

Pipila ka adlaw sa wala pa ang away, si Tapales miuyon ug mipirma na usab sa Ala Promotions og kontrata nga maoy iyang official nga promotional outfit sa sunod niyang mga away.

Ang Ala Promotions mao karoy bugtong promotional company sa nasod nga aktibo usab sa mga interna­tional promotions ug maoy tag-iya sa naila na nga Pinoy Pride series nga nakapasundayag na didto sa America ug sa nasod sa Dubai.