NADALA sa balay tambalanan ang usa ka bata ug usa ka balut vendor human nabangaan niadtong Martes sa managlahing hitabo ning siyudad sa Cagayan de Oro.

Unang biktima ang 5 anyos nga mao si Salvana Cielas, taga Macanhan, Carmen ning siyudad.

Usa ka XRM motorcyle nagdala og palka KB-3915 nga gimaneho ni Edilfredo Nabong, taga lungsod sa Tagoloan, Misamis Oriental ang mibangga sa biktima samtang mitabok sa dalan.

Kalit lang nga midagan ug mitabok si Cielas hinungdan nga nasapon sa motorsiklo.

Samad sa baba ug bun-og sa lain-laing parte sa lawas ang naangkon ni Cielas ning panahona nga daling gidala sa Northern Mindanao Medical Center.

Samtang kritikal ang kondisyon sa usa ka balot vendor nga mao is Aguinaldo Rabali, 37, taga Pinikitan, Camaman-an ning siyudad human nabanggaan sa dyip samtang namaligya niadtong Martes mga alas 6:00 sa gabii.

Nahitabo ang insidente sa Zone-6, Cugman samtang kamulo nga magsuroy sa iyang baligyang balot si Rabali, wala namatikdan sa biktima ang dyip hinungdan dihang mitabok deretso nga nabanggaan.

Ubay ubay nga samad ug bun-og sa lain-laing parte sa lawas ang naangkon sa biktima ug nilapot ang baligya niining mga balot tunga sa kalsada.

Hinuon wala man gipasagdan sa driver nga mao si Franklin Vallejos ang biktima ug dali nga gidala sa NMMC aron matambalan.

Kritikal ang kondisyon niini nga padyon pang giatiman sa mga doktor ning panahona. (SVB)