GIBALHOG sa prisuhan ang usa ka sundalo human nakuhaan og armas diin nakasupak sa Comelec Gun ban niadtong Martes mga alas 11:00 sa buntag sa Barangay Lupon court sa Lapasan ning siyudad sa Cagayan de Oro.

Nakumpiska ang .45 kalibre gikan sa kamot ni Abarasa Jandani-Barulla, 39, taga Lapaz-1, Lapasan ning siyudad, kinsa usa ka sakop sa 30IB-4th Infantry Division, Philippine Army sa Camp Evagelista, Patag ning siyudad.

Si SPO1 Edilberto Barela sa Police Station 3 (PS3) sa Agora nibutyag sa Sun.Star Superbalita ngaÿwala nag-uniporme si Barulla niadtong tungora ug gisuksok lamang sa iyang hawak ang kalibre .45.

Adunay husay nga ipahigayon niadtong tungora kalabot sa ugangan niini ug kini ang nirepresenta sa iyang ugangan sa Brgy. Lupon.

Gipangutana si Barulla kung asa ang ugangan niini apan giingong siya na lang ang makig-areglo.

Gani nitumaw ang taho nga gustong hulgaon sa maong sundalo ang maong husay.

Uwahi na dihang namatikdan sa usa ka Brgy. Police nga mao si Regino Oporto ang pistola sa sundalo nga gisuksok sa hawak hinungdan nga gitaho sa kapolisan sa PS3.

Mismong si Police Inspector Wilyn Rojo sa PS3 ang nisikop sa sundalo ug gibalhog kini sa prisuhan.

Ning panahona gidala ang sundalo sa Maharlika Detention Cell aron tukmang mapasakaan og kaso.

Nasayran nga si Barulla ang ika 16 na nga naaresto human gipatuman ang gunban gikan niadtong Enero 10 ning tuig.

Duha sa mga nakalapas sa gunban sakop sa Cagayan de Oro City Police Office (COCPO) ug sa Camp-alagar Headquarters.

Ang mga armas nga nakuha susama sa .45 pistols, kalibre .38, 9mm, .22 handgun ug 12 gauge homemade shotgun.

Ang maong mga nasikop mag-atubang sa kaso supak sa Omnibus Election Code diin adunay penalty nga usa ngadto unom ka tuig nga pagkapriso.