NAILHAN na sa kapulisan ang usa ka lalaking napalgang wa nay kinabuhi nga gilabay daplin sa dalan didto sa lungsod sa Nabunturan.

Positibong giila sa iyang mga kabanay ang biktima nga si Rommel Lastimado 27, ug molupyo sa Purok 7, Barangay Sta Maria, Nabunturan.

Sa paghiling sa mga otoridad nasuta nga ang gikamatyan sa biktima mao ang dakung bun-og sa nawong nga gituohang gibunalan og kahoy.

Ang biktima dunay deperensya sa pangisip ug nagtungha kaniadto sa Special Class sa Alternative Learning System sa susamang lungsod.

Pasado alas 7:00 sa buntag niadtong Lunes napalgan ang patay'ng lawas sa biktima nga nagbuy-od sa kasagbutang bahin sa dalan didto sa may Barangay Poblacion, sa maong lungsod.

Usa ka Noel Latumbo giingong nakakita sa patay'ng lawas sa nahisgutang biktima.

Ang kapulisan sa lungsod sa Nabunturan misaad nga di lung-an ang pagsubay sa kaso aron masayran ang tawong nagpaluyo sa kamatayon sa biktima. (Marvin Pineda)