Barrita: Pagtudlo og Chief Justice

WA pa matapos ang lantugi kon mahimo bang makatudlo si Presidente Gloria Macapagal-Arroyo sa mosunod nga Chief Justice sa Korte Suprema karon nga talisawop na ang iyang termino sa pagkapangulo sa nasod. Bisan ang mga banggiitang mga constitutionalist wa magkauyon.

Dunay niingon nga di mahimong motudlo ang Presidente sa mohulip kang Chief Justice Reynato Puno nga moretiro sa katungdanan karong Mayo 17, samtang dunay niingon nga mahimo niya kini.

Si Fr. Joaquin Bernas, dean emeritus sa law school sa Ateneo de Manila University ug sakop sa 1986 Constitutional Commission nga maoy nagpanday sa 1987 Constitution, niingon nga di mahimong motudlo ang Presidente sa mohulip kang Puno.

Ang iyang gibasihan mao ang Article 7, Section 15 sa 1987 Constitution nga nagdili sa gitawag nga mga midnight appointments.

Ang maong lagda sa Batakang Balaod nagdili sa Presidente sa pagtudlo og mga opisyal sa kagamhanan duha ka buwan sa di pa ang piniliay.

Ang maong pagdili magpadayon hangtod sa pagkapupos sa termino sa Presidente karong Hunyo 30. Sukwahi ang baruganan sa Sugbuanong Retired Court of Appeals Associate Justice Regalado Maambong nga usa usab ka sakop sa 1986 Constitutional Commission ug karon kandidato sa pagkasenador.

Matod pa ni Maambong, ang constitutional ban sa mga midnight appointments wa maglakip sa pagtudlo sa mga sakop sa hudikatura, ilabi na sa Chief Justice ug mga associate justices sa Korte Suprema.

“It is clear from the proceedings of the 1986 Constitutional Commission that the ban on midnight appointments under Article 7 of the Constitution refers only to positions in the executive department,” nagkanayon si Maambong.

Matod pa ni Maambong, ang Article 8 sa Constitution nga kabahin sa hudikatura, wa maghisgot sa pagdili sa mga midnight appointments.

“The reason is simple: the Constitution recognizes the judiciary as a separate and independent branch of government. The proscription applicable to one is not applicable to the other,” matod pa ni Maambong.

(Ang atong paghisgut-hisgot mahitungod sa balaod madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)

r

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph