GIKONSIDERAR sa kapulisan sa lalawigan nga sulbad na ang kasong pagpatay ni Romeo Duran, ang magtutudlo kinsa gipatay atubang mismo sa iyang mga tinun-an sa Binlod Elementary Sachool sa lungsod sa Argao. Kini human madakpi ang usa sa upat ka mga suspetsado nga si Joel Alforque. Gipanghinganlan ni Alforque ang iyang mga kauban nga sila si Arnel Cabungcal, Marcelo Navares ug Jiffy Cavan. Hinuon, napasakaan na sila og kasong murder sa Provincial Prosecutor’s Office.

Sus, gibayran lang kuno og P2 mil ang maong grupo aron ipapatay si Duran. Mga baratuhon nga hired killlers. Pastilan no, pagkabarato ra sa kinabuhi karon. Nailhan na tuod ang mga mamumuno apan wala pa ma-establisar sa kapulisan ang motibo sa pagpatay kang Duran. Kinsa man ang mastermind? Mao kana ang angayan sutaon sa atong mga imbestigador.

For updates from around the country, follow Sun.Star on Twitter

SULBAD NA?

Basta ma-ilhan og mapasakaan na og kaso sa piskaliya ang mga suspetsado, moingon ra ba dayon kining kapulisan nga sulbad na ang kaso. Bisan kon wala pa madakpi ang mga akusado. Alang nako, makonsiderar nga sulbad ang usa ka krimen kon mataral sa hukmanan ug makonbikto na ang akusado ug makakab-ot na og hustisya ang reklamante.

Ato lang ipahimangno sa atong kapulisan labi pa sa mga imbestigador nga lahi ang investigation. Lahi usab ang prosecution ug lahi usab ang pagkonbikto. Ang pagkakonbikto sa usa ka akusado sa korte mag-agad lang kini sa mga ebidensiya nga i-presentar sa prosecution. Kon walay lig-on nga ebidensiya unsa-on man pagkonbikto sa korte. Ang korte mokonbikto lang kon nakita sa huwes nga walay lama sa mga pagduda base sa mga ebedensiya nga ang akusado gayod ang nakahimo sa maong krimen.

Kon adunay lama sa pagduda, paborable kana sa akusado ug posibleng ma-absuwelto ang akusado. Mao nay gi-ingon sa Ininglis nga ‘beyond reasonable doubt’.

TAGA OMBUDSMAN

Ang mga prosecutors na sa Ombudsman ang mo-prosecute sa kasong murder nga gi-atubang sa kontrobersiyal nga pulis, SPO1 Adonis Dumpit. Maayo ni para makasugod na ang husay. Dugay na kining kasoha ug naghigwa-os na si Janette Badana, inahan ni Ronron Go, ang biktima ni Dumpit nga makakab-ot og hustisya sa kamatayon sa iyang anak. Mi-insister ra ba gyod kini si Mrs. Badana nga walay sala ug walay criminal record ang iyang anak.

Maayo pod kini alang ni Dumpit aron dili siya matanggong og dugay. Korte na ang bahala kon makatarunganon o dili ba ang pagpusil ni Dumpit kang Go.

(bgnalzaro@gmanetwork.com)