Oliver P. Flores
Sogod, Cebu
BATA pa si Selmo, nag-edad og utso anyos. Sayo pa gani sa buntag nangutingkay na siya sa basurahan sa Inayawan. Bisan unsa lang nga iyang ikabaligya sa junk store ni Insek Singa. Sama sa karton, lata, sunog nga sin ug uban pa. Unya ikarga niya kini sa iyang kariton nga minantinil ang pagkabuhat.
Giisip na niyang igsuon ang kariton. Kaabag niya kini sa pagpakabuhi sa adlawng tanan. Inay unta tua siya sa eskuwelahan nia siya sa nagtipun-og nga basura sa Inayawan. Unsaon, iresponsable man ang iyang mga ginikanan.
Usa ka hostes kaniadto ang iyang Mama Mona, pero wa nay kustomer nga mikuha kaniya kay lusyang na kaayo human ipuyo ni Papa Waldo niya sa ilang payag sa eskuwater.
Buntag pa gani nagduwa nag tong-its ang iyang inahan sa ilang dapit, ug ang iyang amahan nakig-inom na sa sama niyang bugoy sa eskuwater. Sugarol pa pod ang iyang Papa Waldo. Kusog sab moinom og bino ang iyang Mama Mona. Nagparehas lang ang iyang mga ginikanan. Wa nay panahon sa pag-atiman kaniya.
Kausa puwerteng bun-oga ni Selmo human niya ikabaligya sa junk store ang nakuha niya sa basurahan sa Inayawan. Wa man god niya ihatag ang kuwarta sa iyang papa.
“Ayaw lang kini kuhaa, Pa!” naghilak si Selmo. “Ipalit ko nig ukay-ukay nga T-shirt ug purol.”
“Saba diha, Selmo! Unsaon man nimo ang purol ug T-shirt sa ukay-ukay nga naa pa may gision nimong mga biste nga puyde pang isul-ob?”
Isog kaayo ang iyang amahan. Namula ang nawong sa kahubog. Ug kay wa man gyud niya ihatag ang kuwarta, gibunalan og bakos si Selmo. Mingaab siya sa kasakit. Ang iyang Mama Mona inay molaban kaniya, nagkatawa lang hinuon kini samtang nagpahubot sa aso sa sigarilyo.
Napugos si Selmo paghatag sa gamay niyang kita niadtong adlawa ngadto sa iyang amahan. Nagbahinay ang iyang papa ug mama sa iyang kuwarta. Unya nanganaog sila sa ilang payag. Gisugal ug giinom sa iyang mga ginikanan ang iyang hinagoan, nga ang husto unta sila ang maghago aron kahatagan siya og maayong biste, maayong pagkaon ug mapa-eskuwela siya.
Kalbaryo ni Selmo ang iyang mga ginikanan. Ug sa iyang kahiubos, sa iyang kariton siya matulog. Mora siyag buang nga makigsulti sa iyang kariton. Mopagawas sa iyang mga kasakit ug pag-antos. Usahay makatulog siya nga way kaon.
UG KARON, nia na sab siya sa Inayawan. Ubay-ubay ang iyang nakuha sa basurahan. Makahalin siyag dakudako sa junk store. Unya samtang nagtulod siya sa kariton paingon sa suking junk store kalit siyang nalipong. Misakit ang iyang tiyan. Wa siyay kaon nga mianhi sa Inayawan.
Nagsubay na siya sa karsada dihang hapit di na siya makaklaro sa dalan. Gipaningot siya og bugnaw.
Ug nadungog niya ang kusog nga singgit.
“Hala! Ang bata mabanggaan sa awto! Naa man god siya sa tunga sa karsada!”
Kritttsss…!
Nakapanguros ang mga tawo sa palibot. Dihay mituasik nga dugo, mitugpa sa kariton nga maayong pagkagupok. (KATAPUSAN)
r