SUGDAN na sa Commission on Elections (Comelec) inabagan sa kapulisan sa lalawigan sa Sugbo ang pagpanangtang sa mga poster sa mga kandidato nga wa pa sa common poster area.
Niadtong miaging adlaw, si Cebu Provincial Police Director Senior Supt. Erson Digal nipagawas og kamandoan sa tanang hepe nga makig-alayon na sa ilang local nga mga opisyal sa Comelec.
Kini aron masugdan na ang pagpanglimpyo sa mga poster nga gipatakaan lang pagpamutang sa mga tawo sa mga pulitiko.
Matod ni Digal nga sa kalungsoran nagkatag na ang mga poster sa mga nasudnong kandidato ilabi na sa mga punoan sa kahoy ug mga poste.
Siya niseguro nga way pilion sa pagtangtang basta makalapas gikinahanglang kuhaon.
Hinuon iyang giklaro nga silang kapulisan di maoy mangunay sa pagtangtang kon di igo lang sila mohatag og siguridad sa mga tawo nga maoy motangtang sa mga poster.
Mga dapit nga lakip sa gidiling butangan og posters mao ang kadalanan, taytayan, pampublikong mga estruktura o edipisyo, mga kahoy, poste o wires, tunghaan, shrines ug dagkong kadalanan.
Ang common poster area mao ang mga dapit nga temporaryong gibutang sa mga kandidato o political party nga eksklusibo lang nga kabutangan og campaign posters sumala sa ilang nasabutan.
r