TULISAN napusilan sa iyang kauban human gipusil ang usa ka barangay tanod nga niresponde sa alarmang pagpanulis sityo Kinto Limbo, Brgy. Capitol Site, siyudad sa Sugbo pasado alas 11 sa milabayng gabii.
Ang kapulisan padayon nga naniid sa mga tambalanan kon asa madala ang tulisan kay gidala kini sa iyang kauban bisan kon nasamdan.
Apan sa wa pa maigo ang tulisan, unang naigo sa pagpamusil mao si Reynaldo Quinones, 51, taga Porok 8, Barangay Camputhaw, nga naigo sa dughan.
Matod ni PO2 Achiles Sanchez sa Fuente police nga nagbarugbarog daplin sa dalan Juana Osmena si Shelby Romero Mosqueda, 33, taga dalan Sanciangko sa downtown Cebu city.
Giduol siya og tulo ka mga batan-ong lalake, usa kanila ang armado ug nition ngadto sa babaye.
Gihatag sa biktima ang iyang cell phone sa tulisan nga nisibat dayon.
Ang babaye nakapangayo og tabang sa usa ka taxi driver, nipahibawo sa barangay hall sa Camputhaw.
Pagresponde na sa mga barangay tanod, niabot sa sityo Kinto Limbo ug ilang nagunitan ang usa sa mga tulisan.
Wa dayon makabantay si Quinones nga diha diay ang laing kaubang tulisan nga armado usab ug ni-rescue kaniya dayong pusil.
Bisan kon naigo na si Quinones, giusban pa siya sa pagpusil apan naigo na hinuon ang usa sa mga tulisan.
Ang samaron nga tulisan gidala sa iyang mga kauban samtang nipalayo sa maong lugar.
Ang biktima nga barangay tanod gidala usab sa iyang mga kauban sa pribado nga tambalanan.
Ang kapulisan padayon pa karong naniid sa mga tambalanan kon aduna ba silay mga pasyente nga napusilan nga posibleng maoy naunay. (JFT)