ORMOC CITY -- Duha ka pulis ug usa ka sibilyan ang nasikop sa anti-illegal drug operation sa Barangay Macabug, Ormoc City, alas 11:50 sa buntag, Biyernes, Pebrero 15.
Giila ang sibilyan nga si Ricsan Salle, 29, nagpuyo sa maong barangay.
Samtang ang duha ka pulis mao sila si Police Officer 1 Ronilo Felizarta ug Police Officer 1 Pelboy Lopez.
Si Felizarta nadestino sa San Vicente Police Station sa Northern Samar samtang si Lopez nadestino sa Northern Samar Provincial Mobile Force Company.
Ang operasyon gipangulohan sa Ormoc City Drug Enforcement Unit pinangulohan ni Police Senior Inspector Franklin Romeo Parangan Jr ug Police Chief Inspector Demosthenes Magnaan sa Mobile Force Company.
Nagsilbi usab nga perimeter security ang Philippine Army uban ni Captain Khevin Jay Latoza.
Kahuman sa transaksyon, mi senyas na ang poseur buyer nga positibo ang resulta.
Wa na makapalag ang mga suspek sa dihang gipalibutan sa mga operatiba.
Nasakmit ang pito ka pakete nga may gituhoang shabu, mga paraphernalia, cellphones ug kalibre .9mm nga service firearm.
Mahinumdoman nga si Felizarta usa sa mga pulis nga gireklamo sa kanhi hepe sa Albuera Police Station nga si Police Chief Inspector Jovie Espenido kay gialegaran kini nga protektor ni Kerwin Espinosa.
Kasong kalapasan sa Republic Act 9165 o Comprehensive Dangerous Drugs Act ang giatubang sa mga suspek.