DRUG den nga gipadagan sa usa ka ex-convict ang gironda sa Waterfront Police Station diin siyam ka manuyopay ang nadakpan, Biyernes sa gabii, Pebrero 15.
Ang target sa buy-bust operation mao 64-anyos nga si Alejandro Gallado alyas Alynga, usa ka ex-convict sa kasong highway robbery ug murder, taga Sitio Villagonzalo Dos, Barangay Tejero, siyudad sa Sugbo.
Matod ni Sr. Insp. Joemat Pomarejos, hepe sa Waterfront Police Station, sa dihang napalitan sa iyang personnel si Gallado, naabtan pa sa sulod ang siyam nga nanuyop nga silang Reymar Cruda, 20, taga Barangay Cogon, Compostela, silang Chino Tambog, 19, Joseph Saquin, 28, Dexter Tumulak, 25, nga puros taga Barangay Pajac, dakbayan sa Lapu-Lapu, Juril Durog, 24, taga Barangay Labogon, dakbayan sa Mandaue, Nebalyn Caballero, 30, taga Barangay Lorega, dakbayan sa Sugbo, Jenny Catalan, 21, taga Barangay Tejero, dakbayan sa Sugbo, Ricardo Colegado, 38, taga Poblacion Barangay 3 sa Tuburan ug Charlie Erato, 20, taga Barangay Cogon, Compostela.
Pulos sila nakuhaan og drugas nga motimbang sa 1.5 ka gramo nga mobalor og P10,200.
Wala malakip sa listahan sa mga nalambigit sa ilegal nga drugas si Gallado apan naka monitor na sila sa ilegal nga negosyo niini sa maong lugar nga maoy hinungdan nga ila kining gipaubos sa surveillance.