HINCKLEY, Minnesota -- Kwarta na, nahimong bato pa. Kini human gipalukapa sa pinoy boxer nga si Giovanni “Little Giant” Escaner (19-4, 12 K.O.) ang kontra sa third round apan mibangon ug midaug pa.
Midaug via round 8 knockout si Chicago, Illinois-based boxer Joshua “Don’t Blink” Greer Jr. (20-1-1, 12 K.O.) ug nadepensaan ang iyang WBC Continental Americas Bantamweight Title.
Wala unta magpalupig ang Bisaya boxer nga si Escaner gikan sa unang round, ikaduha ug labi na sa ikatulo diin miigo ang iyang right straight punch sa tiyan nga nakapahapla ni Greer apan swerte nga naabtan kini sa oras.
Pagbalik sa 4th round, naka-recover hangtod nga nagbara-bara sila sa ibabaw sa ring, diha'y mga higayon nga sikit pa sa manag-uyab o bell-to-bell fight ang inawayan sa duruha ka fighter.
Permi gyud unta makapasulod sa kinumo o maka-deliver si Escaner sa isulti sa iyang trainer nga si Carl Peñalosa apan nalupig lang gyud sa birada.
Sa ikawalo nga round, nasudlan sa right straight to the liver si Escaner sa hapos ni Greer hinungdan nga giiphan ni referee Mark Nelson apan wala na makabarug ang pinoy fighter.
“Sorry, pildi naigo ko sa lawas, okay raman unta ang kumo pero nasentro ko niya, sayang kaayo,” matod ni Escaner ning tigbalita.
Si Escaner lumad og kababayan ni ALA boxer-turned trainer Michael “Bruce Lee” Domingo sa 1st class Municipality of Lebak sa probinsya sa Sultan Kudarat sa Region 12 sa Mindanao, miangal sa katugnaw sa Minnesota nga nakaapekto kaniya.
Ang Greer-Escaner usa ka 10-round regional championship nga giduwa sa Grand Casino Hinckley isip undercard sa Rob Brant-Khasan Baysangurov WBA Middleweight Championship diin midaug TKO11 ang nahauna nga gidalit ni Bob Arum sa Top Rank Promotions pinaagi sa ESPN.
Si Escaner nga sakop sa Marty Elorde Promotions mobalik sa Pilipinas karong Marso 1 aron modeskanso unya mobalik sa ensayo aron depensaan ang iyang RP Bantamweight nga titulo.
Base sa Compu Box stats, si Greer nakapatama sa 150 sa iyang 480 ka puspos samtang si Escaner nakaigo sa 95 sa iyang 434 ka mga kumo nga gihapos.