GIUSBAN pagmakmak sa San Miguel Alab Pilipinas ang host Zhuhai Wolf Warriors, 105-79, niadtong Biyernes sa gabii sa ASEAN Basketball League sa Doumen Gymnasium sa Zhuhai, China.
Ang Alab Pilipinas nagsalimoang pa sa sayong bahin ug naggukod kini 13-18 human sa 1st quarter.
Human niini, balanseng ataki ang gihimo sa Alab Pilipinas sa pagmugna og 11-0 nga rally nga maoy sinugdanan sa hingpit nga pagkausab sa dagan sa estorya sa duwa.
Sama sa naandan, gipangulohan ni import Renaldo Balkman ang Alab Pilipinas pinaagi sa iyang 19 puntos, nidugang og 15 puntos si Ray parks Jr. samtang nitampo og 15 puntos, 14 rebounds ug 11 assists ang 7’3” nga higanteng si PJ Ramos.
Ning-amot og 10 puntos matag usa sila si Caelan Tiongson ug Brandon Rosser alang sa Alab Pilipinas.
Adunay higayon nga miabot og 31 puntos ang labaw sa Alab Pilipinas nga maoy labing dako nilang nahimo. (ESL)