WALA gipasaylo sa iladong tulisan ang Valentine’s Day ug gitulis ang LBC niadtong Pebrero 14, mga ala 1:21 sa hapon sa dalang Pabayo-Chavez, dakbayan sa Cagayan de Oro.
Giila sa kapulisan ang usa sa mga suspetsado nga si Alyas Bengcol kinsa maoy responsable sa sunod-sunod nga pagpanulis niadtong nilabay nga tuig.
Sa nahipos nga impormasiyon, mokabat sa P38 mil ang nadala sa duha ka mga suspetsado gikan sa maong patigayon.
Gibutyag ni Police Inspector Lemuel Sabanal, deputy station commander sa Police Station 1 (PS1) sa Divisoria, nga sayon lamang nga nasulod sa mga tulisan ang maong patigayon ilabi na nga wala gihapon kini guwardiya.
“Aduna’y duha ka tawo nga nisulod sa ilang buhatan so far sa atong pagtan-aw sa area wala’y guwaridya gyud ang LBC,” matud ni Sabanal.
Giingong naila ang usa sa mga suspetsado human nga nakuhaan sa closed-circuit television (CTCV) camera atol sa pagsulod niini.
“Nakita diha sa CCTV ang atong intelligence community identify nila ang usa sa mga suspek, mao kani ang mga tawhana nga nilusob usab sa LBC Velez nganlan nato og alyas ‘Bengcol,’” dugang ni Sabanal.
Base sa kuha sa CCTV nisulod ang duha ka mga suspetsado sa LBC ug gilimas ang salaping cash dayong sibat sakay sa XRM nga motorsiklo nga kolor itom ug puti nga kombinasiyon.
Kahinumdoman nga gipatawag na kaniadto ang tagdumala sa LBC sa komitiba sa Police, Fire and Public Safety kauban ang komitiba sa Trade and Commerce ilabi na nga namahimo na kining “suki” sa pagpanulis tungod kay walay guwardiya.