NAKATAKDANG moaway og balik karong Hulyo si kanhi pound-for-pound king Floyd Mayweather Jr., basi sa mga taho nga nanggawas kagahapon sa internet.
Ang TMZ Sports miingon nga nalansang na ang sunod nga mga away ni Mayweather.
Matod pa nga mosagubang si Mayweather og upat ngadto sa lima ka exhibition fights karong tuiga nga maghatag kaniya og $80 million.
Niadtong Bisperas sa Bag-ong Tuig, nakig-away na sab si Mayweather og mixed martial arts fighter ug yano niyang gilupig si Japanese MMA star Tenshin Nasukawa. Ning awaya, nakabulsa si Mayweather og $10 million.
Gikataho nga miuyon na si Mayweather nga makigbatok og wala pa mailhang kontra alang sa sunod niyang tahas, nga maghatag kaniya og laing $10 million nga ganti.
Sa interbyu sa TMZ Sports, nagkanayon si Mayweather nga andam siyang moaway og exhibition fight gumikan kay gawas sa kantidad nga iyang mabulsa, dili sab kini sama ka delikado sa regular nga away boksing.
“It’s all about being smart. My faculties are very important,” matod pa ni Mayweather.
Kining kalambuan dili maayo sa pandungog alang kang World Boxing Association (WBA) welterweight champion Manny Pacquiao, kinsa dayag sa iyang intensyon nga makig-away og balik kang Mayweather.
Human sa kadaugan ni Pacquiao batok kang Adrien Broner ning bag-uhay lang, personal nga gihagit og rematch ni Pacquiao si Mayweather, kinsa nagtan-aw sa ringside niadtong higayuna.
Apan hangtod karon, wala’y imik si Mayweather kabahin sa hagit ni Pacquiao hinungdan nga nagpabiling tanghaga kon aduna ba’y mahitabong ikaduhang engkuwentro tali sa duha ka mga boksidor.
Hinuon kon dili si Mayweather, adunay daghang gustong makig-away sa Pambansang Kama sa Pilipinas nga pulos adunay kalidad.
Giklaro nang daan ni Pacquiao nga dili siya mopili og kontra ug nag-agad ra siya sa iyang promoter. ESL