HANGTOD asa kutob ang imong pagsalig sa Ginuo?
Alang sa magsuong Limpio, mas nagkalig-on ang ilang pagtuo sa Labaw nga Makagagahum dihang nagsakit og cervical cancer ang ilang inahan nga si Necitas Limpio.
Niadtong 2004, na-diagnose si Necitas nga dunay cervical cancer dihang nag-edad kini og 60.
Matod ni Jona Limpio-Vaflor, ikatulong anak ni Necitas, nga wa maoperahi ang ilang inahan tungod sa kapaspas sa cancer cells sa lawas niini nga niabot na og stage 4.
Apan bisan sa maong pagsuway, mapasalamaton gihapon ang magsuong Limpio sa Ginuo ug mas nilawom ug nihugot ang ilang pagsalig Niini.
“Among am-aman ang among mama, “Ayaw kabalaka Ma, kay naa man ni tambal.” Unya manghilak mi magsuon pero di mi magpakita niya,” asoy sa 39 anyos nga ginang.
Nadiskobrihan nila ang sakit sa inahan human kini nag-bleeding nga sa sinugdanan nagtuo sila nga normal lang kini ug kabahin sa iyang pag-menopause.
Bisan kon naglisod sa panalapi, nakumpleto nila ang medication sa inahan nga gipaubos sa chemotherapy ug radiation therapy aron pagpatay sa cancer cells.
Sigon ni Jona swerte usab nga nakarga niya isip dependent sa Philippine Health Insurance Corporation (Philhealth) ang iyang inahan nga nakatabang og dako sa ilang pagpatambal niini.
“Gipahiluna sa Ginuo ang tanan. Kon buot sa Ginuo nga ayuhon ka, wa gyuy imposible niya, maayo gyud ka,” pamulong ni Jona, magtutudtlo sa Quiot Elementary School, dakbayan sa Sugbo.
Sa maong pagsuway, nakita ang pagtinabangay sa lima ka magsuon ug mas nalig-on ang ilang prayer life ug ang pagpaduol ngadto sa Ginuo.
Si Jona nipaambit nga sa maong mga panahon mas nasabtan niya nga ang kinabuhi sa tawo hinuwaman ra.
Nagsige usab siya og tambong sa healing sessions sa Mary’s Little Children Community sa dakbayan sa Talisay ug halos matag adlaw mosimba ug pangayuon ang kaayohan sa inahan.
Nakatabang usab sa kaayohan sa ilang inahan ang pag-ampo sa ilang mga kauban sa trabaho ug mga higala labi na sa iyang mga kauban ni Jona sa Lectors’ and Psalmists Ministry sa Sto. Tomas de Villanueva Parish sa Barangay Poblacion Pardo, siyudad sa Sugbo.
“Gipangayo nako sa Ginuo nga maayo akong mama. Siya ang among strength,” dugang ni Jona.
Niadtong Enero 7, gisaulog sa tibuok pamilya ang ika-75 nga kasumaran sa adlaw nga natawhan ni Necitas sa ilang panimalay sa Upper Suran, Barangay Kinasang-an, ning dakbayan.
Human sa kapin usa ka semana, nipanaw ang iyang kapikas sa kinabuhi ug amahan nila ni Jona nga si Crispin Limpio Sr. niadtong Enero 15 sa pangidaron nga 70 gumikan sa severe pneumonia. (SCG)