NAGKOMITAR si Philippine Sports Commission (PSC) chairman William Ramirez nga trataron ang Talaingod girls volleyball team, nga bag-ohay lang midaug og medalyang bulawan sa Batang Pinoy 2019 Mindanao Qualifying Leg, og libreng biyahe padulong sa Manila sud sa usa ka semana.
Gisaad kini sa PSC chief ngadto sa tim ni coach Bobby Jones Sinco una ang kampeyonatong dula batok sa Davao City selection gihimo niadtong Pebrero 9 sa University of Mindanao (UM) Tagum gym.
Gitumbok ni Ramirez nga ang tim sa Talaingod kasagaran gilangkuban og mga lumad edad og 15 anyos ug paubos.
“I talked to them before the finals saying ‘Win or lose, you will go to Manila for one week and play with teams from La Salle, Ateneo and UP.’ They are indigenous people but they are the champion,” matud ni Ramirez.
Dugang ni Ramirez nga ang tim mag-estar sa Philsports ug tingali hatagan og Team Philippines jackets aron nga madasig sila. Ang ilang pagkaon ug plite sa eroplano abagahon sa PSC.
Matud ni Ramirez nga ang “Talaingod is a poor community. These girls lift spirit in the midst of poverty.”
Ang Talaingod spikers, sumala niya, mao ang testamento kon giunsa sa PSC pag-angkon ang mandato nga gihatag ni Presidente Rodrigo R. Duterte nga himuon ang paugnat sa kusog nga makaabot ngadto sa mga pobreng komunidad sa nasud. Usa ka bulawang medalya ang nahatag niini sa tibuok delegasyon sa Talaingod sa Batang Pinoy 2019 Mindanao Qualifying Leg.
Ang Visayas Qualifying Leg gitakda sa Pebrero 23 hangtud Marso 2 sa Iloilo City. (PR)