SUBSOB karon ang panawagan sa kagamhanan pinaagi sa paningkamot sa nasudnong departamento sa panglawas nga mabakunahan ang mga kabataan batok sa makamatay nga tipdas.
Kini human ang grabeng pagtaas sa ihap sa mga kaso sa tipdas ug ang pagkamatay.
Sumala ni Health Secretary Francisco Duque III nga misaka na sa 115 ang mga namatay gikan lang niadtong Enero hangtud Pebrero 13 ning tuiga.
Samtang, niabot na sab sa 6,921 ang natakbuyan sa sakit kon diin ang pinakadaghan mao ang National Capital Region nga 1,752 kaso. Gisundan kini sa Region 4-A nga naa sa 1,653 ug ikatulo ang Region 3 nga moabot na sa 282 kaso.
Samtang dinhi sa Davao Region, bisan tuod og di taas ang ihap, itandi sa milabay nga tuig, apan di gihapon kita magkampante kay niabot na sa 80 ang kaso sa tipdas ang natala dinhi.
Gani dinhi sa siyudad sa Davao duna nay usa ang namatay nga gikompirma mismo sa City Health Office.
Ang Department of Health bag-o lang nilusad og weekend immunization campaign batok tipdas. Nagpasabot nga bisan og Sabado ug Dominggo padayon silang mamakuna sa mga kabataan.
Ang bakuna dunay duha ka “doses” nga magsugod sa unang “dose” sa edad nga 12 hangtud 15 ka bulan, ug ang ikaduhang “dose” gikan 4 hangtud sa 6 anyos ang pangedaron.
Nakasabot kita nga duna nay kabalaka ang mga ginikanan sa pagbakuna gumikan sa isyu sa Dengvaxia. Apan ang Dengvaxia lahi ra sa bakuna batok sa tipdas.
Ang bakuna sa tipdas hagbay nang ginahimo dinhi sa nasud sa mga kabataan ug napamatud-an nga positibo kining makapakgang sa tipdas.
Gani gipasalig man sa DOH nga ang maong bakuna luwas alang kanila.
Busa di nato hikawan ang atong mga anak sa pagpabakuna niini kay alang man kini sa ilang kaayohan.