BULUAN, Maguindanao Province -- Gironda sa militar ang himoanan og armas sa mga miyembro sa Bangsamoro Islamic Freedom Fighters (BIFF) alas 6:15 sa buntag niadtong Biyernes, Pebrero 15.
Sumala kang Philippine Army's 6th Infantry (Kampilan) Division Spokesman, Major Arvin Encinas nga gironda sa hiniusang puwersa sa 33rd Infantry Battalion, PNP-SAF ug CIDG-ARMM ang paktorya og mga pusil nga gipanag-iyahan ni Abusama Abpun sa Barangay Poblacion, Buluan.
Narekober sa raiding team ang daghang mga tag-as nga matang sa armas, mga bala ug mga kagamitan sa paggama og pusil.
Walay napakita nga dokumento si Abpun sa mga nakuha sulod sa iyang gunsmith hinungdan nga siya gidakop sa mga awtoridad.
Apan gipanghimakak ni Abpun nga siya nagahimo og armas alang sa BIFF ug matud niya nga mga pusil nga nakuha sa iyang balay gipa-ayo lamang kaniya.
Gikanayon ni CIDG-ARMM director, Senior Superintendent James Gualmatico nga dugay na nila nga gipanid-an si Abpun nga nagahimo og armas alang si BIFF ug ubang mga armadong grupo.
Gibalhog sa prisohan sa CIDG-ARMM ang suspek ug gitakda nga pasakaan og tukmang kaso. (Edgar E. Fuerzas0