MORAG dili normal nga tawo ang mangambisyon nga mahimo siyang kabos. Lisod ang kahimtang sa kabos. Daghang nagapuyo sa mga kilidkilid. Kon may mapuy-an, dali kining matumpag ug daghang tulo panahon sa ting-ulan. Baho. Alimuot kaayo. Pangitaon pa ang pagkaon. Dili klaro ang CR ug kaligoanan.
“Bulahan ang mga kabos kay inyoha ang gingharian sa Dios,” misugod si Jesus sa iyang mga kabulahanan diha sa ebanghelyo ni Lucas. Midugang si Mateo og “kabos sa espiritu”. Mga kabos sa materyal nga butang ang gipasabot ni Lucas. Susama kining duha kay ang lintunganay mao ang pagsalig sa Dios. Ang kahimtang sa pagkakabos naghatag kanila og mas daghang higayon sa pagtugyan sa tanan sa Dios. Apan aduna say mga kabos sa butang nga kulang og pagsalig sa Dios sama nga adunay mga tawo nga way puas ang pagsalig sa Dios.
May tulo ka bahin ang kabulahanan: ang pagkabulahan, ang kahimtang nga himuog bulahan, ug ang ang ilang mabatonan nga kabulahanan. Nagagikan ang lintunganay sa pagsalig sa Dios sa ikatulong bahin. Ang mohatag sa gingharian sa Dios o, sumala sa ikaduhang kabulahanan, mopabusog mao ang Dios mismo. Ang ikatulong bahin naglarawan sa kataposang panahon diin ang tumutuo, uban sa tibuok katawhan, moatubang sa Dios nga walay dalang kabtangan, titulo, tawhanong gahom, salapi, dakong balay, ug uban pa. Magbarog kita nga walay tawhanong sandiganan. Ang Dios mobulahan sa mga mingsalig kaniya.
Apan ang maong kabulahanan nagsugod na karon. Gani adunay aspeto sa kinabuhi sa mga kabos nga pangitaon pod sa mga adunahan. Momantener lang og kamunggay ug kamote nga maayo man diay sa lawas ug hunahuna. Mabaw og kalipay ang kabos. Kon masakit, kon unsa ray maabot nga tambal. Kon mamatay, way daghang lalis mahitungod sa katigayonan. Daghang adunahan way kalinaw. Maglisod sila og tugyan sa kaungalingon ngadto sa Dios kay may mahimo pa man sila nga tawhanong buhat. Wala kini magpasabot nga dili kita manlimbasog aron maarang-arang ang kahimtang sa mga kabos. Kinahanglan manlimbasog kita aron mapalambo ang kaayohan sa kadaghanan.
Gihisgotan ni propeta Jeremias ang duha ka kinaiya sa tawo: ang motalikod kaniya ug mosalig sa kusog sa tawo ug sila nga mosalig kaniya. Ang ikaduha “mahisama..sa kahoy duol sa tubig; mokuyanap ang mga gamot niini ngadto sa sapa.” Magmabungahon kini bisan sa ting-init. Bulahan ang mga kabos sa espiritu.
Kining pagsalig sa Dios nag-agad sa usa ka sukaranan nga pagtuo, nga si Jesus nabanhaw. Sumala pa sa sulat ngadto sa mga taga-Corinto, “kon wala banhawa si Cristo, kawang lamang ang inyong pagtuo ug makasasala gihapon kamo.” Ang maong paglaom langitnon kay “kon ang atong paglaom kang Cristo ania ra niining kinabuhia, nan kita ang labing makaluluoy sa tanang mga tawo.” Ang pagkakabos sa espiritu diay maoy molambigit nato sa kaluoy sa Nabanhwang Jesus.