PASALAMATI ang Diyos sa iyang paghatag og kibuhi.
Mao kini ang sentro sa wali ni Cebu Archbishop Jose Palma atol sa misa sa Walk for Life for the Youth nga gipahigayon sayo sa buntag sa Sabado, Pebrero 16 sa Cebu Metropolitan Cathedral.
“We thank the Lord sa atong kinabuhi. Life is a gift and life is sacred tungod kay kining kinabuhi gikan sa Diyos. We share in the divine life ug mao kini ang hinungdan sa atong respeto sa kinabuhi. We respect tungod kaning kinabuhi is a gift of the Lord,” matod ni Palma.
Iyang gipadayag ang hugot nga baruganan sa simbahan batok sa bisan unsang paagi nga magkutlo sa kinabuhi.
Matod niya ang Diyos ra ang dunay katungod sa pagkutlo sa kinabuhi.
Ang simbahang Katoliko supak sa contraception nga giduso sa kagamhanan.
“Nagkatigom kita diri sa atong cathedral. Himayaon nato ang ginoo ug pasalamatan siya tungod aning higayon sa pag Walk for Life, pagmisa karong adlawa. Salamat gihapon kang Mama Mary, kang San Pedro Calungsod ug kaninyong tanan,” sigon niya.
Dul-an sa 3, 000 ka mga partisipante ang misalmot sa Walk for Life for the Youth nga gasugod sa Fuente Osmena Circle hangtod sa Cebu Metropolitan Cathedral.
Gilangkoban kini sa nagkalain-lain nga mga organisasyon, mga youth, estudyante gikan sa nagkadaiyang mga eskwelahan ug civic groups.
Wa usab nagpauwahi ang kapolisan sa pagsalmot niini. Anaa usab ang mga karo nga nagdala sa imahen sa Birhen sa Fatima. (Jolissa Mae Taboada, USJ-R Intern)