ANG Davao City Police Office (DCPO) nagdasig sa katawhan sa Davao City nga mo-report dayon kung dunay makita nga miabuso sa ilang mga binuhing hayop.
Si DCPO director Senior Superintendent Alexander Tagum nagbutyag nga abli kanunay ang mga presinto sa kapulisan ning dakbayan aron sa pagdawat sa mga reklamo labi na sa pag-abuso sa mga hayop.
Suma ni Tagum nga angay lamang nga masilutan ang duha ka mga lalaki nga midabdab sa iro ug ilang gipulutan nga nakuhaan og video didto sa Tahimik Avenue, Barangay Matina Crossing.
Subay sa balaud, mamahimo nga mapriso ang si bisan kinsa nga mopasipala sa hayop nunot sa balaud nga Republic Act (RA) 8485 as amended sa RA 10631 kon Animal Welfare Act.
Adlaw’ng Sabado, pormal na nga giduso ang reklamo didto sa Talomo Police Station samtang gihulat ang paggula sa warrant of arrest aron sikupon ang mga responsable nga mag-amahang Epefanio ug Armando Pulbos. (Jeepy P. Compio)