MANGUTANA ko ni Gob. Junjun Davide kon iya bang pasagdan kining mga kadagkuan sa Cebu Provincial Health Office nga silotan ang tulo ka nars nga nibonggo sa tinuod nga nahitabo kang Jimby Casas nga gipasagdang mamatay sulod sa emergency room diha sa Tuburan District Hospital.
Imbes daygon ang tulo ka nars, gisuspenso man hinuon ni PHO Chief Rene Catan.
Matod pa, nakalapas kuno ang tulo sa right to privacy sa pasyente. Hehe, alang diay sa kadagkuan sa PHO, mas bug-at ang right to privacy kay sa right to life.
Trabaho unta sa atong mga opisyal sa panglawas nga di mamatay ang pasyente. Apan mas mahinungdanon sa PHO ang katungod sa pasyente nga di mahibaw-an nga gipasagdan lang kini diha sa emergency room hangtod nga namatay.
Mas importante sa PHO nga di mopya-it ang mga nars. Pya-it must be suspended. Kangil-ad baya. Hinanggaw sab.
Mas bug-at niining mga opisyal sa panglawas sa lalawigan ang right to privacy kay sa right to life?
Dr. Catan, kon buhi pa to ang pasyente, sigurado ko nga nisinggit na kini nga wala atemana diha sa emergency room. Nganong itago man sa pasyente, kon nabuhi pa, nga iyang kinabuhi man ang gihulga? Ingna na lang gyud, Dok, nga nasuko ka nganong gibuking?
Gob. Davide, latusa intawn nang mga opisyal sa lalawigan nga nagpabadlong. Please ayaw pagsud-ong lang sa daplin kay nagpasabot na nga uyon ka sa nahitabo.
GIASPALTO NA
Bahala na og gi-aspalto lang ang dalan sa among village karon lang bag-o ug makaingon kita nga may bahid sa politika ang nagpaluyo sa maong proyekto. Hapit na gud ang eleksyon.
Magpasalamat gyud ko kang Mayor Eddie Gullas ug sa iyang apo nga si Kong. Samsam Gullas nga sa katapusan, naaspalto na kining grabi ka gubaon nga mga dalan sa Carmen Village sa Poblacion, Syudad sa Talisay.
Kadto pang panahon ni kanhi mayor Soc Fernandez nga naaspalto kining among mga dalan kaniadto. Sukad niadto, wala na mausabi og aspalto ang maong mga dalan sa among village.
Ug sulod sa pipila ka tuig, grabi ang mga libaong niini. Gisamotan pa gyud niining kapin na sa tuig nga drainage project sa dalan Uldog nga walay kahumanan ug ang mga dalan sa village maoy alternatibo bisan sa mga dagkong trak.
Gani, dunay grabi ka lupa nga bahin sa Second Street nga giabunohan kintahay og lapok. Ang resulta kay malubong ang mga moagi nga sakyanan. Bisan gani ang trak sa basura sa Syudad di mosukol.
Nabiktima sab ang pick-up sa akong higala nga nahinayak sa pag-agi ug nalubong mga alas 2 sa kaadlawon. Kay gikan lagi mi nanglaag. Nahuwasan tawn.
Apan sa miaging semana, nalipay ko nga nagsud-ong nga gi-overtime gyud ang pagtrabaho sa tulo ka dalan sa village. Salamat kaayo. (@anol_cebu sa Twitter)